長壽地獄 by 松原惇子

2019時代革命，一個對香港人好重要好重要好重要嘅改變，係劃分左「黃絲經濟圈」。

本來，食餐飯唔係咩大事，搵個乾乾淨淨食物還過得去嘅地方，等位、坐低、指住menu叫野食、食飽、俾錢、byebye。
自從有左黃絲地圖[1]，去到一間黃鋪食野，會留意埋佢嘅人，每次都好心滿意足，佢地身上總有種文明嘅氣息。冇乜額外付出就可以遠離生蕃咁生活。仲會留意下店入面所有物件，知道俾左嘅tips會轉個頭出現係星火/612[2]手上，又或者成為店門口隨意取用嘅口罩。

跟住黃絲地圖去左間Bookstore&cafe Urban Space[3]，只係得4張細枱。入面都幾多書睇(絕大部份係中文書)，主要係社會議題嘅書，但座位少坐耐d好似會搞到出面嘅人冇飯食。

食野之餘睇左店家提供嘅 — 長壽地獄 by 松原惇子[4]。

係一本討論人口老齡化嘅書。著於2015年。當年日本超過100歲嘅老人已經有6萬幾。

書入面講到，(//入面係我嘅comment)

+++++++++++++++++++++++++++++++++++++++++++++++++++

1. 日本人主流已經唔再嚮往長壽。理所當然，安樂死成為一個熱門話題。
除左安樂死 — 失去求生意志嘅重症患者，由醫院方面幫佢舒服咁了結生命；日本仲有一種「尊嚴死」，意指「係病危時刻不提供緊急救援」，換句話講「等病人自然死」。
//無論邊一種做法，對醫謢人員黎講都好殘忍。//

2. 討論點算係「人道」。可能我跳住睇，睇完都仍然摸不著頭腦。
//我唔理解「人道問題」同「道德問題」係咪同一樣野。如果係，每個文化都有稍微相異嘅道德標準，咁世界上就冇一個統一嘅「人道標準」，咁美國有冇資格介入香港「被非法政權屠城」事件；如果唔係，即「人道」跳脫左道德層面，係一個純理性考慮，咁一般非專業人士冇資格評論，要留俾專家同政府高層考慮，聽落非常不能接受。//

3. 老人家嘅痛苦來源係乜野。習慣多年嘅自在生活，要佢地去老人院過群體生活，好難。再好一d，住貴價私人serviced住宅，主辦單位總是搞得強差人意，而有錢嘅老人家總是要求高d。又，當養老成為一門生意，冒牌、虐老、hea做嘅老人助護不是新鮮事，而失去左管理自己能力嘅老人家根本冇辦法管理到佢地。

4. 老人家嘅家人嘅負擔。

5. //有個位我特別深印象，書舉例嘅miserable elderly family係「年邁夫妻」同「姊妹家庭」。回想起之前香港都有老人家三姊妹住埋一齊，其中一個精神失常挖去家姐眼球嘅慘劇[5]。我會諗，點解「兄弟家庭」就鮮少聽聞？//

6. 歐美對老人「吊命」嘅做法同亞洲大相逕庭。唔會「胃開洞喂食」，唔會「鼻插喉喂食」。書中以荷蘭做例，荷蘭人比較會「唔人道」咁，病危階段只會提供口服藥，「任由死亡降臨係老人身上」，「老人亦視為理所當然」(my words, not quote from book)

+++++++++++++++++++++++++++++++++++++++++++++++++++

想講我最近親眼見到，醫護人員用盡全力咁搶救我嘅親人。鼻插喉供純氧、頸動脈「種豆」inject藥物同葡萄糖。係非常恐怖嘅情景。病人非常難受，訓著會不自覺幫自己拔喉所以手被綁實係床，理性崩潰。度過危險期後，聲帶俾插喉磨損，變左聲。因為轉身都做唔到，底側嘅皮膚大範圍潰爛。

另外，我婆婆90歲，耐唔耐要入廠大修。佢係我一生中最愛嘅人。所幸仲行得走得。

我讀預科時，安樂死問題正正開始爆炸性引起討論。當時一個唔記得名嘅重症病人，帶領一班同樣係病人、或病人家屬示威，要求政府將安樂死合法化。
有一日，中化科堂上討論呢個問題，Miss叫我地舉手表態。全班30幾個人，得我同另一個男同學反對「安樂死合法化」。當時我先知自己係少數派。

到今日我仍然反對。雖然唔知當有一日，touch wood身邊至親去到要尋求安樂死嘅地步，甚至係我自己去到果個位，會唔會改變諗法。
我嘅諗法冇辦法用道德語言表達，可能冷血到令人討厭。我認為呢個唔係一個「道德」或者「人道」甚至「經濟負擔」嘅議題，係關乎我地未來嘅方向，同埋人嘅尊嚴。

仲有本好出名嘅書都係講老人醫療問題 — Being Mortal by Atul Gawande[6]。我只睇過summary&review。冇記錯仲有提到親人可以點同老人相處。有機會都想拎黎揭下(點解英文書咁鬼貴)。

Ref.:

[1] 我用開嘅Google Map黃藍地圖
[2] 支援抗爭者嘅星火抗爭 同 612基金
[3] Urban Space openrice page
[4] 長壽地獄 by 松原惇子 博客來買書link / The News Lens 網站提供部份節錄
[5] HK01對該事件嘅報道
[6] Amazon買書link