早兩日同中同傾左幾句，佢話覺得我好叻，細個坐我隔離，見我上堂又唔聽書，功課又唔交，但係考試高分過佢(但係佢做到我做唔到嘅野)。印象中我成績都唔係好果隻，大學都考唔到，同埋我記得自己中學都有聽書的
唔交功課就真嘅。屋企冇書枱，如果我想做功課要趴係床度做。有一期唔交功課到老師狂call我阿媽，阿媽晚晚食完飯就踢我入房做功課，做完先可以出黎一齊睇電視。我記得果期播緊尋秦記（2001年首播)。我做完功課就出黎睇少少，慢慢追唔到d劇情，都唔知睇左d乜，尋秦記都未播完，我就放棄「為左睇電視做功課」，我成績又唔係話好差，阿媽都由得我，d時間唔記得左拎左黎做乜，反正就係好窮，但好自由，一路順風咁唔做功課到畢業(咁講係誇張，我估係做一半唔做一半)，不嬲都冇電視癮、煲劇癮
我細妹係乖d，好怕老師鬧果隻，印象中佢老師冇打過黎投訴佢唔交功課(不過佢衰另外一d野)。我懷疑佢其實受左我影響(佢細個唔知點解好崇拜我)，一樣都唔睇電視、唔太煲劇。佢結婚搬出去果陣，新屋連電視都冇買。後來佢話佢老公成日ot 到好夜，夜晚間屋得佢一個人有d得人驚，所以都係買左部電視，播下野，有聲有畫面，等間屋熱鬧d
我阿爸阿媽仲係非常沉迷睇電視，佢地後生明明係可以去唔知行山定爬山(見過佢地拍拖d相，去行山，我阿爸成隻馬騮咁爬上舊大石)，阿爸後生撈偏見識過唔少普通人成世都冇機會見到嘅野。呢d都冇減弱到電視對佢嘅吸引力。啱啱Google，原來香港最早嘅彩色電視廣播係1969年。阿爸阿媽都60年頭段生人，係佢地十歲前後，最需要娛樂嘅時候，彩色電視係作為最高等級嘅無上體驗咁橫空出世。可以話，佢地同電視係最適合大家嘅時間相遇，有宿世姻緣，呢世都戒唔到都唔出奇
我老公都係電視迷，佢細個俾佢爸爸媽媽限制睇電視(所以有做齊功課)，大左終於有得自由睇電視，大睇特睇。有時d劇我話我都有興趣(意思係只有2-7%興趣)，佢會堅持同我一齊睇，結果因為要等仔訓左覺先煲，同埋我其實唔係特別着緊，松隆子嘅新劇，短短10集煲左2個月，先睇左一半
我諗睇電視as娛樂方法呢件事，is 100% a social construct? 曾經做過一個安老院Project(唔係慘慘老人果隻，係一路俾人鬧佢收得貴嘅丹拿山富貴老人屋)，有幾層係安置需要醫護support嘅老人家，無論單人房、雙人房定多人房，每張老人嘅床係必然對住一部電視。另外，冷氣本身係中央控制，即係每間房入門口個位有個panel(thermostat)，可以調較溫度同風量。有次開會Client side負責Operation嘅同事話，唔可以咁安排，班老人家會爭控制個thermostat，會日日嗌交，要cut左佢，轉用remote，擺係nurse station，有需要嘅時候由護士控制冷氣。所以，班老人家得到最大嘅autonomy就係控制專屬於佢地個電視remote。單向接收電視內容，老人家係receiver end，影響唔到外界，唔會造成騷亂。不過較大聲d可能都會俾人投訴，放係今日，開會途中應該會有人提出轉用耳機，「電視開太大聲班老人會日日嗌交」。係管理嘅角度睇，你越係isolated就越冇辦法引起混亂。完全冇暗示你係一個問題。係管理角度，有問題嘅人同冇問題嘅人都係一視同仁，只有反抗嘅人係special。但我唔係批判睇電視呢件事，睇電視對管理者有咩意義，同對使用者有咩意義，係兩樣野黎，揀自己想要嘅野就得唔洗理咁多
好似講得太遠
戲反而我睇唔少，一齣戲短短地，deliver一堆msg，某程度上係最完美嘅娛樂。後來唔記得係點開始唔鍾意睇。不過我有幾年好認真返工，果幾年冇乜娛樂(但都唔算好痛苦)，可能關事。同煲劇唔一樣，我其實有嘗試過搵唔睇戲嘅原因出黎，想自己睇返戲。一開始我估可能要紀錄片先ok，但我都好少睇紀錄片(雖然興趣比戲大dd)；或者係個依家個潮流唔啱我口味(路蘭Memento之後果d都唔啱我口味)，A24都冇乜興趣(雖然最後都有睇左d)；最新嘅理論係「演員睇完劇本拍、第一幕佢地個腦已經有晒成齣戲嘅outline」所以唔鍾意睇戲。咁啱前排因為睇Still Alice，對「演技」呢樣野有左興趣，睇完唔同流派嘅演技理論可能會開始睇返戲
上Threads見識到依家真實嘅香港人諗乜。睇左年幾，一直以來，耐唔耐就見到唔同嘅人出post講「去睇戲，周圍嘅人冇manner嘈住晒」，明明成篇都唔關齣戲事，佢地係會寫明係睇邊齣戲。我嘅解讀係，入場睇齣戲完場淨係得返「其他觀眾好煩」，證明齣戲嘅存在、對你嘅影響細過果個好嘈嘅觀眾
另外有班人好不滿呢個時代嘅香港戲太多社會議題，每齣戲講唔同嘅弱勢社群，好似睇緊「鏗鏘集」。我之前寫ROMA果陣寫過，放係呢度都有效：
即使好戲如小偷家族(我認為佢題材係可以深入過外僱題材)，都少不免有種教育性質，which is，想話俾你知社會上有班弱勢群體生活得唔太得體，需要關注
即係，假設觀眾係唔理解以上嘅野，而睇完會對社會有更全面更近真嘅理解
而如果有人講「你應該去睇呢齣戲」，暗示你需要接受更多教育去理解得更深，相信只對95%人有效
但係我記憶中係有一齣「社會議題」嘅戲，係我嘅惡夢，haunted左我幾年，目前仲未可以釋懷到
係Three Billboards Outside Ebbing, Missouri (2017)，應該係2018年睇。講女主角個女被姦殺，搵唔到兇手，女主角就自行整左3塊大型廣告牌，分別寫左
“Raped While Dying”
“And Still No Arrests?”
“How Come, Chief Willoughby?”
一開始好多人同情佢，Chief Willoughby都去搵佢，承諾會盡其所能破案。冇破到案。後來d人開始覺得女主角好煩，覺得d廣告牌影響到成個社區嘅mood。女主角慢慢成為社區眼中嘅一個異物，越係冇人理解佢，佢越漸行漸遠。記住一個受害者有咩問題？但係唔記住都唔可以話有問題
我成日話自己冇朋友，可能係呢齣戲真正影響到我———唔係有定冇朋友，而係，係人群當中俾人視作異物果一個moment，有時知原因，有時唔知，突然感覺到自己變左異物，極之唔好受。我都見識過其他人成為異物。而群體入面，好多人其實只係跟大隊冇乜立場，佢地「認為呢件事冇問題、唔去question佢」都令我好厭。Even worse, 我自己都有做過「壞人」，一樣非常討厭
又見過人問「點解香港電影界，唔興好似其他國家咁，改編已有嘅文學、漫畫、網絡小說，搬上大銀幕？」
有幾個似係行內人好認真咁覆佢「因為試過，發現成本仲高過請編劇從零諗個劇本出黎」「改編仲多野煩」
果種唯一目的係控制成本、睇黎都唔太尊重本土其他創作嘅態度，我入場支持香港戲太少，鬧佢會俾人話我冇資格，我都懶得鬧
最後係早兩日先見到，有人入場睇完本土戲，冇鬧觀眾嘈，而係話「個結局唔係happy ending，睇得我好唔滿意，建議大家買飛表達支持，但係唔好入場睇」
我都有reply笑佢兩句。但撇除對happy ending太過執着呢點，佢真金白銀支持本土產業，身體力行出post呼籲大家用錢支持本土產業，係我見過我理解唔到嘅人入面最正義正確嘅一個
我窮，但唔緊要，香港多的是努力返工希望得到更好嘅生活嘅人，希望大家真金白銀支持本土所有創意產業，黎緊10年，留返至少5部足以影響一個人幾年嘅廣東話作品，留俾我仔大個睇