給十九歲的我 & ROMA

給十九歲的我 wiki page

小朋友出世之後，衡量犧牲珍貴獨處時間去做自己野變得非常謹慎。2023年元旦日入戲院睇《給19歲的我》，可以話係唯一一次完全做返自己。兩個幾鐘，唔記得左自己係邊個，同隔離嘅陌生人一齊又喊又笑。完場睇晒credits都唔想走。

—

《給19歲的我》係香港紀錄片，傳統女校英華中學，佢係港島西半山嘅校舍太舊，校方決定原址重建，班老師同學生暫時遷址去深水埗。時任校長石玉如就計劃，紀錄一班同時體驗到三個校舍(原校、深水埗臨時校舍、新校舍)學生嘅成長，搵左校友張婉婷導演團隊，以極低成本(演員係校長老師同學生，旁白係導演本人)係10年前開始拍攝。最終新校舍未能如期完工，片中嘅學生冇係新校舍返過學。而意料之外咁，拍攝時間橫跨左香港2014年佔中(魚蛋革命)、2019年反送中運動(雨傘革命)，以及2019年後各國開放救生艇後嘅港人移民潮。片尾嘅學生同開拍當年相比，彷如隔世。

另外，其實唔係幾關事，我想提下香港嘅傳統女校。當年香港開埠，唔同國家嘅傳教士(主要係英法美)到埗後發現，中國重男輕女文化底下，香港長期有為數唔少嘅女嬰遭遺棄。傳教士s設立左專門收女嬰嘅孤兒院，甚至係門外設有放置女嬰嘅櫃俾人匿名棄置。再後來又有傳教士s辦學嘅女校。到今日，呢d當年為左遺棄女嬰開設嘅學校，成為左香港家長趨之若鶩嘅傳統女校，以成績優秀、校風純樸聞名。

戲入面有提及香港嘅動亂，導演冇特別去深探當中嘅政治元素。亦冇特意迴避。而中間提及班學生選學生會嘅一段，呢種充滿文明社會公民意識嘅敘述，我諗依家個強權政治係更唔願意見到。坊間最早係用「冇刪改政治場面」黎宣傳呢齣戲，但老實講，政治係呢度反而最不起眼嘅吸引點。

—

戲中特寫左幾位學生，各有唔同品性。呢樣野就咁講好似好普通，但係短短兩個幾鐘可以將幾個唔同嘅品性present到出黎係好高手先做到。10年時間，見證住每個人，品性唔變，心態變得成熟，由無憂無慮去到意識到自己肩負嘅野，再去到為左身邊嘅人思考未來。所謂成長。係非常殘酷嘅過程。

佢地令我係短短兩個幾鐘入面，出現左多到需要用空間去形容，有海洋咁大嘅思緒，又笑又喊。我唔識點形容，唯一只可以講係一齣好戲。而當同朋友提起，面對佢嘅反應係「港產片冇興趣」，又令我出現左大概一個泳池咁多嘅思緒。

今次睇我最印象深刻嘅一句quote(大意)

如果你覺得一個人令你好難受，你想象未來嘅佢，未來嘅佢係唔會有問題，你依家係幫佢由「依家嘅佢」，過渡到去「未來嘅佢」

—— 校長石玉如

有幾愛一個人先可以，用想像中未來完美嘅佢，去安撫自己繼續愛呢個人，繼續對佢好

或者如果係對一件物件，或者係一個地方，或者係其他野？

—

我相信再睇一次會有其他感受。如果時間夾到想同老公去睇多次，或者，如果有眼淺嘅朋友，我唔介意短期內睇第三次。再以後嘅時間，我都可能會隨時再睇。

— — —

ROMA wiki page (HK Chinese)

ROMA wiki page (English)

再寫埋ROMA

當年純粹係見呢齣黑白戲，係netflix上嘅preview拍得好靚，因為當年唔洗湊仔，好輕鬆咁，一年入面睇左3次。但後尾佢拎左Oscar Best Director，都冇乜朋友睇完會同我傾

又係鍾意到除左講一句「好戲」唔知講乜好，可能大家個感覺都係咁

—

琴晚同朋友食飯，講到佢地屋企嘅工人姐姐。講起有個人個工人好靚女，可以去拍「淪落人」(ROMA攞獎之後香港拍嘅類似題材電影，我睇左trailer冇乜興趣，因為同ROMA差太遠)

坊間明明有好多呢種弱勢群體嘅戲(朋友又提埋小偷家族，都幾好睇嘅)，我諗左陣點解得ROMA會令我一睇再睇

其一係，拍得靚因為技術水平，同埋導演嘅taste，同埋美術指導嘅功力(係咪可以用錢買到？)

其二係，即使好戲如小偷家族(我認為佢題材係可以深入過外僱題材)，都少不免有種教育性質，which is，想話俾你知社會上有班弱勢群體生活得唔太得體，需要關注

即係，假設觀眾係唔理解以上嘅野，而睇完會對社會有更全面更近真嘅理解

而如果有人講「你應該去睇呢齣戲」，暗示你需要接受更多教育去理解得更深，相信只對95%人有效

—

ROMA嘅主角係一位工人姐姐，導演冇將佢嘅忙碌、低薪、受歧視、困境係一個慘慘嘅框框入面敘述。ROMA唔係一齣叫人去關注工人生活質素嘅戲

講起，我有位過左世嘅親人，堅持唔用地拖拖地，一定要用抹布，跪係地下一格格楷磚咁抹。係咪慘慘？你必須要同佢係同樣高度，見到佢眼神入面，要將個屋企用自己嘅手變成心目中乾乾淨淨嘅模樣，嘅神采，你先會明，佢同覺得佢慘慘嘅人，係唔同層次嘅生物

ROMA嘅主角，對導演黎講，與其成為慘慘嘅佢得到給予同情，佢係更值得作為一種永恆人性嘅載體咁出現，which is 真誠同堅韌。佢嘅僱主唔擁有呢種特質，良好教育同養尊處優換唔到最珍貴嘅野

係香港講真誠同堅韌非常陌生，即使呢一刻我淨係打字都覺得自己好做作。香港人講求身光頸靚smartass嘅生存形態，唔身光頸靚又老老實實嘅case，只可以做慘慘，受到俯視

我又諗我對上一次從身光頸靚嘅人身上感受到永恆人性係幾時？

係個大我幾年嘅男士(當年社會對佢嘅定位係社運老鬼)，諗住攞自己儲黎買樓果100萬出黎，懸賞想搵陳彥霖之死嘅真相，佢係朋友圍內問大家點操作係最安全同有效。而冇幾耐後，有KOL真係咁做左，但都搵唔到答案

同ROMA最接近嘅堅韌，唔知會唔會係依家嘅移民港人身上搵到

2023年，又想睇多次ROMA