早兩日係social media同人絕交，頭先㩒下計數機計自己幾歲，即刻有d唔好意思，以「同網友絕交」黎講，我好明顯超晒齡
大概用左兩日時間，沉浸式(immersive)感受到以為係自己嘅friend嘅網友s，原來對friend嘅理解同我唔一樣，我投放係佢地身上嘅友誼，係唔對等咁多。覺得自己成個弱智咁
講起呢，上年8月嘅時候我俾「絕交網友」其中一位嘅言論激發到，寫左篇三千幾字嘅mk仔女style回憶出黎，關於一班friend過打band網友(我在內)嘅大型嗌交事件。寫完果下我覺得太過private，完全唔準備post。即使係呢個冇乜人知道嘅網上角落，都唔捨得post出黎。今日睇返覺得其實都ok，可以post出黎
事件係發生20年前(if not 21)，我係圍內成班friends嗌大交嘅時候，冇選擇中立，冇選擇講道理(不過當時都冇講道理取勝嘅能力)，冇選擇食花生，冇選擇逃避，選擇左不顧一切撐我最鍾意嘅朋友。因為咁，佢冇感受到我呢兩日感覺到嘅嬲到爆炸同傷心，呢一刻諗返起我都心有餘怯：
(依家嘅自己同當年嘅自己講) 好彩你揀啱左，如果你揀錯左，你呢世人每次諗起都會內疚自己因乜事咁冇撚用，因乜事以為理性會威d。你20年前(if not 21)靠直覺就做左啱嘅選擇，叻女
以下係上年寫嘅文，睇返一次都覺得好青春：
「唔識judge」
13/8/2025
(呢篇打俾未來嘅我自己睇，語無倫次)
呢期有個幾controversal話題，朋友話佢「唔識judge」。呢句唔識judge令我諗起件咸豐年間嘅事
果時我年紀係依家一半都冇，識網友係forum一大堆咁識(因為興趣)，性別都唔需要disclose。每日放學返屋企就對住一班唔識嘅人講好多野(用電腦)，為左同人傾計去學打中文，去學decode火星文，去學各種網上社交禮儀同詞彙
後尾係一個都幾多人上嘅forum識左班朋友，都只係知道性別咁嘅level，大家唔知大家幾歲，只會隱約感覺到邊個細d邊個老d
相信我依家面對個仔同學嘅爸爸媽媽，唔好意思問佢地咩background，就係源於最初係institution以外識到嘅朋友嘅經驗係黎自識網友，習慣左、同埋真心覺得唔知對方background咁傾計舒服d。anyway開場白就到呢度
因為有男有女，又大家感覺差唔多年紀，又，係網上declare另一個user id係自己嘅「另一半」，實在太輕鬆，當時有唔少人就係forum「拍拖」甚至「結婚」。好mk好夢幻，亦好純情
好啦以下終於講到正題：
當我地成班frd玩到熟左，甚至我成為左forum其中一個subforum嘅admin(早期好多admin都係學生黎，因為最得閒，職責係幫手remove下d白撞痴線佬嘅post咁)。我在位(yes, i was a 朕 at some point)期間有諗住改革，因為我個sub太多垃圾留言，我出公告話要改革，唔俾再留垃圾留言。點知好多本身唔出聲+留垃圾留言嘅人(當年個個都係真人黎，冇bot)突然出聲捍衛自己留垃圾留言嘅權利，呢件事後尾我都唔係好記得點收科，淨係記得最終極嘅結果，係導致當時真係俾錢set server嘅金主(本身乜都唔理)都上黎睇下咩事，咁啱果期我地玩緊spam msg，搞到佢覺得個forum嘅head admin(佢現實嘅一個frd，20年前已經戴紫色冇度數con嘅一個男仔)亂咁黎，哦左head admin幾句，分左d權俾其他人。最尾我地最frd果幾個人轉左用分身ac，真ac基本上唔太用
omg又唔覺意離左題… 以下係真係正題，真真的
咁就話說有一個sub就係俾人傾計嘅，冇主題，純文字，交友用。通常一個9up topic起左，後面就唔知咩事傾到幾十版，去到幾十版打後，大家覺得冇乜人會咁無聊追到呢度，就開始真正咁講自己野，去到十幾版打後都仲傾緊嘅就得我地成班frd
點知有一期黎左d新人，好似我地咁吹得，而我地又好友善，會同唔識嘅人都傾計傾到幾十版。但係都有d差別待遇，至少我地班舊人有交換過childhood trauma(?)，有d仲有係forum以外嘅交流，我覺得係唔同嘅
而有一日，其中一個新人，一個女仔黎，文字都非常強調自己係女仔嘅人(其他人好多耐唔耐會轉下性別，有時話自己女有時男)，突然間，有一日，無啦啦，係純文字吹水嘅地方post左自己嘅selfie。呢個係個返唔到轉頭嘅點
去到呢個位，性別終於就露出左佢嘅真身。班男士就非常開心，本身唔多搭理個事主，因為人po左張相就同人好熟咁
女士嘅反應就有唔同。有人竟然跟機，你po我又po，都po左自己selfie，同樣都得到一班男士like share and comment
有d就當冇事發生，繼續好似平時咁，但係會避開唔入去selfie po吹水(eg: me)。但係d人氣去晒selfie po度，加上有班平時唔吹水唔9up、活躍係其他sub嘅人，特登走黎同selfie girls傾計，搞到其他topic冇乜人
同我最friend果個女仔(佢叫Ω)就好反感，佢一開始都冇乜野其實，我唔記得係咪有特別一件事trigger到佢露出反感，當時仲有另一個講野好惡嘅女仔(年紀大d，大學生黎)同佢一齊，鬧po selfie嘅女仔「你po一次咪夠，又唔係靚(事實)，普通傾計唔洗日日po相囉」我份人比較溫和(某程度上只係怕輸)，我當時攝高枕頭諗左晚，但冇寫低諗左咩，唔記得左諗左咩，之後就全力支持Ω同大學女仔，成為左戰力嘅一部分，但我都係拾佢兩個牙慧，都冇乜諗法
之後班男士(包括同我地好frd嘅、網上男友老公)就攻擊返轉頭，話「人地po相關你咩事？」變左保護po selfie嘅女仔咁話
個惡惡嘅大學女仔，係嘈得最勁嘅時候，po左自己selfie，大概係要反駁d人話佢「妒忌人靚過你」
咁事實佢幾靚女的。佢係個好人，講野有文有路，係果一刻竟然真係po自己樣出黎，欣賞佢
我同Ω都算係漩渦中心，我地都冇po到selfie，到最後forum都執埋，都冇po過。其實Ω係個靚女黎，佢係另一個出名俾人po selfie嘅forum “xxzone” (一講d回憶返晒黎，中學果時d女同學，如果覺得自己係靚女會post自己張相上去睇下多唔多人like，有人就因為咁出左名做埋明星，亦有人偷偷po左冇人like，俾長期mon po嘅同學發現，柒左俾人笑。不過我覺得俾人笑得嘅都係因為針對果個人人品問題，唔係因為佢唔靚而笑佢)，Ω po過幾次，次次都有一堆人reply搵佢做model影相(又，其實門檻唔太高，我有同學真係咁去左做model一日俾人影，冇錢的，只係得到d相嘅copy同當識左個朋友)，我冇問過佢有冇真係出去俾人影過
打太多廢話添，簡單一句Ω係個靚女。關於佢，我仲可以講好多好多野，我發覺太過熟悉太過理解佢，反而唔知點樣揀一兩件事出黎總結佢，小說入面可以做到只係因為作者只係要左一個人嘅小部分人格，Ω嘅完整人格(雖然只得幾年)仍然係我心入面儲存得好地地，本身我諗住寫左出黎，就算腦退化，以後有一日我掛住佢都可以睇下，而記憶入面嘅佢嘅data已經有左自己意志，唔俾我咁唔尊重咁將佢平面化咁寫出黎。ok
Ω嘅網上男友我都好記得，佢係大學生，Ω當年好似中六，我再細少少。我連Ω男友生日都記得。Ω男友爺爺過身，寫左篇長文，本身係個有d內斂嘅人，寫文就充滿感情，老實講我覺得佢係總受。Ω好鍾意佢，就咁表面睇係鍾意佢木木獨獨。d人成日話「開朗嘅女仔(Ω?)鍾意木木獨獨嘅男仔」，感覺仲流過我阿媽d 9up。同埋Ω嘅開朗都唔係果種真開朗。但真開朗同Ω嘅開朗要點分？話時話，點解淨係介紹下佢男友都要是旦作個戀愛理由出黎，呢隻logic絕對係d中文堂作文風格，做左乜就一定要搵個冠冕堂皇理由，結尾係有冠冕堂皇嘅得着，我成日避免咁寫，會考中文仲低分過英文，英文都已經一pat屎咁
Ω嘅男友冇係呢場戰爭入面狠狠咁支持佢。佢本身就唔太參與糾紛，所以，都唔會顯得特別冇撚用。點解Ω咁鍾意佢？
後來呢班朋友入面我只約過Ω，約左兩次，其他朋友有見過相，有諗過約，最終冇約到。最後果次見到Ω係selfie事件之後幾年，佢話佢嘅網上男友(就係上文嘅冇撚用男友)話佢知就黎結婚，我問你有冇約過佢出黎，Ω話有諗過，最後冇。我同Ω係網上講野好似小朋友，現實就唔知點解係兩個洩氣嘅成年人
selfie事件之後，金主見咁多member鍾意po相，特登開左個新嘅sub俾佢地po相交友，冇記錯嘅話，多左呢個新sub先終於有男士po自己selfie(其實有個基佬一直用自己相做profile pic，得閒就po下自己個樣，都算青靚白淨，無奈冇乜人理佢)，成為左一個mk度max嘅區域。正式標誌「純文字、純友誼」嘅時代終結
我一路都*唔識judge*當年係selfie大戰，自己係咪揀左正確嘅一邊，以僅餘嘅記憶梳理下：
- 1 一開始po相嘅人嘗試用自己係女仔呢個身份attention seeking，其他女仔都有呢個身份，冇選擇用，當然會唔gur
- 2 呢件事其實係「用文字交友嘅女仔」vs「用相+文字交友嘅女仔」嘅戰爭，其中前者嘅對象係所有人，後者對象得男人(well，當時以我觀察係咁，20年之後嘅今日比較唔會得男)，而後者仲用埋班男人玩代理戰爭
- 3 但係退一萬步講，成班後生仔女，變成mating性質嘅交友平台都在所難免，只係時間問題。懷疑係舊時網速慢、影相門檻高(未有得用電話影相)所限，先冇咁多人po selfie，我地只係目睹左轉變嘅一刻
- 4 如果我當時做下和事佬，calm down下Ω，可能反而我可以同佢做更耐朋友(me 2026 comment: Not!!! 你冇做和事佬先係最正確嘅決定)
- 5 其實我明佢感受，靚女係天生冇得揀，尤其十幾歲果陣，基本上背下乘數表都有男仔肯靜靜聆聽。去到一個「人人都平等，冇性別冇年紀冇外貌」嘅新世界，終於佢可以用自己真正嘅一面示人，都識到一班朋友覺得佢份人好正，呢個就係佢嘅桃花園，證明佢嘅內涵都一樣吸引到人。竟然有人黎po相攪亂佢個場，仲要本身醜樣過佢，仲要班男士好受落，唔嬲就假
- 6 係我搖擺不定嘅時候，係有一個肉眼睇唔到嘅時間點，我要係果個時間點先前表明立場，遲過係唔ok。我冇機會、亦唔識得好認真咁諗「我想得到點嘅結果？」依家嘅我會處理得好d (me 2026 comment: Not!!! 最好嘅處理係靠直覺)
- 7 我果時諗嘅好簡單，只係呢班朋友之中我最唔想冇左邊個，我就要企係佢身邊
回到主題，一開頭講嘅「唔識點judge」係關於一個女仔po相(歷史重演！)，件事大概係咁：
- (1) 俾好多人攻擊佢唔知醜樣定肥定扮野(我一開始miss左睇唔到個post)，
- (2) 之後好多人為佢護航「po相冇問題，回應嘅人乜都鬧一餐係冇禮貌、心地唔好」，
- (3) 之後引起更廣泛、更宏觀嘅討論：「放上公海嘅內容，係咪應該可以俾人自由評論」
- (4) 有識得嘅網友，平時都雙方傾到下，今次持相反意見互相攻擊
呢兩日我完全唔得閒追，呢期我會正經講野係因為有少少得閒，呢兩日連續遇到仔同學嘅媽咪，佢好好人對小朋友都好有耐性，但佢個腦就好似愚公嘅山，好大大舊，完全冇靈活轉動嘅餘地。對佢講野令我好很攰。如果佢唔好人我反而可以唔理佢。我成日話最重要係善良，但最大殺傷力嘅同樣係善良。呢樣野好難搵到志同道合嘅人呻(唔返工、全職湊小朋友、自己接送小朋友、嫌仔同學嘅家長悶)，要對住空氣呻
anyway，呢於網上d hit topic，我係超級想參與的，冇返工嘅人最鍾意係呢d topic入面搵到社會參與嘅快感。但正如我上面所寫，(1), (2), (3)係三個獨立嘅議題黎，係短短兩日就同一個事件出始左3個分支，仲要唔知今日會唔會又出現一個新嘅，對我呢d唔得閒人士非常唔友善。我嘅能力同available嘅時間唔足夠跟得上
但我諗得最多嘅係「唔識點judge」呢個諗法。首先我要多謝講呢句嘅人，令我有衝動寫左一大論廢話，其實我想講嘅野非常簡單，絕對唔需要回憶咁多野，打咁多字，但係我真正enjoy嘅野，與其話係judge/學識judge一件事，不如話係回憶同寫一大堆廢話
引用占星師Dananla形容Leo Moon(即係我)嘅一段話
They can get love bombed so easily because emotionally speaking, they are looking for validation. It’s not that “oh I want compliments, I want praise all the time just because I love it. I want to hear about me.” That’s not what a Leo moon is. A Leo moon wants to understand itself. It wants to see itself reflected back in the world around it.
識judge，唔識judge，根本唔重要。觀眾當左自己係主角，係一個笑話。無論識唔識judge，觀眾嘅comment都係reflection of something。作為觀眾，我就係要講，要唔識judge都judge下，我諗嘅野唔係我，係reflection of this world