係垃圾

阿媽拎左張舊相問我記唔記得相中人。

相中係4-5歲嘅我，同另一個高我少少嘅女仔，好開心對住鏡頭say yeah!
我「呢個咪我堂妹」
媽「唔係呀，呢個係阿麗，大過你架」
係喎，雖然有d似樣，但堂妹細我3年，我4-5歲嘅時候佢仲係BB黎。我問邊個係「阿麗」

原來阿麗係佢「工友」嘅女。阿媽講起，我出世之後，佢再返左半年工就辭左職，到我同細妹中學時先返返工。佢同工友失去聯絡好耐，近排係facebook or wechat個搵朋友功能相認返。阿媽約左佢地飲茶，我都跟埋去。

*** *** ***

阿媽同工友見返好開心，講過不停。阿麗已經結左婚，老實講變左個肥妹…… 佢話我冇乜點變，哈。阿媽好少講佢後生嘅事，我好奇問工友佢地以前返工係點。

我「你地以前係同事，各自會做d咩？」

媽「咪車衫車布lor」

工友「我大d，佢(指我媽)車布，我係整版」

我(心諗原來係阿媽嘅上司黎)「咩係整版？」

工友「即係諗下點整，係個機度記低d數，之後就交俾你媽咪佢地，咁佢地就跟住個版同d數照車塊布出黎」

我「下？即係有program架？要入落電腦？」

工友(做埋動作講解俾我聽)「係有部機架，入d數入去，左邊^%*$^$#%^#$@#@$，右邊&^$%^@$#$#」

我(開始聽唔明佢講乜)「好似好勁咁，係咪好難架？」

工友「做開就識架啦，唔知難唔難呀」

我「你係咪一路都做整版？」

工友「你媽咪冇做一排我都冇做啦，去左做生意」

我「咁你學識整版咪嘥左？」

工友哈哈哈大笑「有咩嘥，果d野…… 係垃圾黎，識唔識都冇所謂」

我「啊？」跟住一齊大笑

後記:
因為聽唔明佢地講緊咩，detail部分可能有記錯。
google完我估工友係講「車版」(ref)，好似係山寨人地件衫咁解… 我依然覺得工友好勁。