Teddy等到巴士了

大概6年前，我係街大汗dup細汗咁作左個新詞俾Teddy。當日嘅情景係咁：

我等緊巴士，等左半個鐘
果時未有到站預報系統，巴士成日脫班，一等可以唔知等幾耐
我仲可以選擇行15分鐘去最近嘅地鐵站。但係搭地鐵上上落落，加上由地鐵站再行去目的地亦唔近，所用嘅時間係唔會快過一程巴士。
最重要係，轉搭地鐵，我之前等巴士嘅時間咪「蝕左」？
到底我應該繼續等巴士？定果斷放棄去轉搭地鐵？

係呢個咁矛盾嘅時刻，我突然明左Teddy點解唔肯同佢男友分手，仲是9旦作左個名「等巴士效應」

而今日，Teddy終於都等到架巴士。佢用左11年

我地係同一年同依家個另一半拍拖，佢地早我地幾個月
由day 1起我已經覺得Teddy
男友係不情不願咁同Teddy一齊。相信Teddy自己都明，但佢一開始真係好鍾意個男仔，隨時可以結婚咁
而一講結婚個男仔就俾個plan出黎，話「完成目標xxx就結婚」，當一個目標完成，又提出另一個。Teddy向我講起過3個，每次都非常無奈地，透露好想結婚，以及，男方好有抱負佢認為值得等

大概用左5年時間，Teddy先feel到中伏，幫自己搵出路。係呢方面，Teddy係一個好地道嘅香港人，唔會「裸辭」，佢計劃係新戀情足夠穩定，進入「可以隨時結婚」狀態，再同現男友分手
佢男友「為買樓工作忙」(男友自己聲稱)，每星期只會見佢一次，所以Teddy有大把時間發展其他戀情。淨係計佢有同我講嘅都有過2個…
我睇住Teddy貌似全情投入、返返去啱啱拍拖嘅甜蜜心情，其實唔太接受佢腳踏兩船，又有少少鄧佢開心
而佢嘅努力冇換黎佢想要嘅野，佢依然都係同佢男友一齊，佢男友今次話有錢買樓就結婚

第6年，我同我男友自己搬左出黎同居
Teddy本來已經少左同我聯絡，之後更加少

第7年，我同男友決定結婚。我有通知Teddy

我結婚後冇耐，約左Teddy同其他幾個女仔frd一齊食飯
Teddy突然變左女權分子，佢覺得女人最重要有自己事業(不過Teddy係冇)，唔應該咁早結婚，佢認為「現代女性最好30歲後先結婚」。同時佢又不停笑在場嘅一個單身朋友仲係單身

我當時feel到Teddy壓力就黎爆煲

只係，我絕唔會，好似好多年前咁，勸佢分手
事關佢當年，真係聽我講分左手。第二日夜晚約我出黎喊到豬頭咁，我話你做得好啱。但世事難料，原來佢同時約左男友1個鐘之後出現，佢地係我面前復合。Teddy仲同佢男友講我覺得佢配唔起Teddy
依家諗返起成件事真係好青春

Anyway，佢終於等到巴士，而我係「冇見一排仔都生埋」

我知道自己有左bb嘅時候正正係Teddy壓力爆煲果期。我唔想刺激到佢
所以佢到我仔出世，先thru instagram知道
而佢要結婚呢件事，我係由佢嘅instagram story得知(限時動態，即係如果我冇及時睇到，就會過期冇左)

可唔可以當做係一種報復？

我記得中學放學，我地兩個一齊係冇人嘅後巷9叫
我人生第一次係71上街遊行，好熱，身邊嘅人就係Teddy

我記得中學嘅時候，有日lunch，食上海麵
一個搭枱嘅中年男人，食食下望住Teddy講，佢個樣係相學入面係「怪相」，要贈佢幾句
其中我淨係記得個男人話

「你第時個老公會好錫你」

後來我地有耐唔耐提起呢件事
一齊憧憬，Teddy會有白馬王子一樣嘅老公