無關戰爭

進入全職湊仔mode之後，呢個blog完全荒廢左。個仔都就黎歲半，除左學講野表現遲緩，好在都肥肥白白冇乜病痛。於是我又可以得閒寫下blog。

今次係關於烏克蘭。但又唔關烏克蘭事。

是日睇左張相，內容係烏克蘭一個小朋友失救，醫生仲努力急救緊，面上係心痛又唔甘心表情；小朋友嘅爸爸成身血，坐係隔離崩潰左。

睇到果刻我覺得成個人跌左落冰點。

下面有人留言quote左George Orwell一句唔知乜。見到Orwell個名都估到大概講乜，我完全skip左。

之後有人覆：

quote Orwell嘅人只係收埋自己，唔想面對現實，對件事冇幫助。He doesn’t give a damn and just hides himself.

我突然間明左d野。

平時同人相處，有d人係個正直嘅好人，樂於幫朋友，鍾意分享。但去到某d位，會感受到少少違和感。違和感即係，呢個人對事情嘅反應或者佢做嘅事，同佢係我心中嘅印象唔一致。

呢個人點解會咁，唔係重點。

重點係，見到一件事令人好心痛、好嬲，其實就咁表達好心痛好嬲就可以。

如果唔係創造緊一d新野，純粹只係留comment，創意係多膠魚嘅事。

甚至乎簡單一句粗口，will do.

quote Orwell唯一值得俾like嘅係，介紹左Orwell俾唔識佢嘅人，enlighten左一d人？(中國人?)

不過，透過新聞，從現實見到普京入侵其他國家點仆街冚家產，定係睇百幾年前嘅Orwell嘅文字，邊樣會令人更痛恨暴力？擁護文明？

呢個就係另一個課題。我又有d明白唔想面對現實果種心情。

最後，我嘅立場係，烏克蘭會贏，成為更受尊敬嘅民族。我一直深信係咁。

ps. 我覺得咁影相對個失救小妹妹有d唔尊重，對佢爸爸都好唔尊重。唔會repost出黎。純文字討論足矣。