跌壞左支鏡頭

話說之前唔小心，最sharp果支鏡頭係書櫃跌左落地。當時試過仲影到，冇乜理

有日帶出街，返黎睇返d相，同跌之前有d唔同左，中心位冇本來咁sharp(數唔到眼睫毛了)，同埋本身都幾嚴重嘅紫邊好似再嚴重左

果下諗，係咪要買過支新(HKD3.xk，唔平唔貴咁)？同一款鏡頭買兩支好似好傻仔。諗左幾日，買左另一焦段嘅一支平價鏡。失去左數眼睫毛嘅樂趣。好在，估唔到我同新焦段幾夾，影到d好得意嘅畫面

但我又唔捨得掉跌壞左果支鏡。佢仲有d特色係我鍾意嘅

件事過左幾個月。慢慢我已經唔太介意數唔數到眼睫毛。於是又拎左支壞左嘅鏡頭出黎影。佢嘅散景同色水我仲係好鍾意

反而，冇左數眼睫毛嘅執著，我冇好似以前咁，努力去捕捉靜態嘅川。而係，係佢跑黎跑去，彈上彈落嘅時候(即係95%時間)㩒快門。靜態嘅川，運氣到左自然會影到

心態改變左，我睇返影出黎嘅結果，仲更加接近真正嘅佢

我會諗，如果話影結婚相嘅攝影師，係好自然會追求越影越靚，咁，好似我呢挺影仔女嘅老豆老母，係咪都會好似我咁，越來越追求影到小朋友真正嘅自己

又或者，得我呢挺，跌壞鏡頭冇錢買過支新嘅窮L，「落街冇錢買麵包」，先會有咁L獨特嘅心路歷程