世界末日女朋友

(係notes搵到，今年1月打完唔記得左post)

world’s end girlfriend，簡稱世界末日女朋友，in my opinion係日本最強嘅experimental(?) band(其實係one man band)，我大概係2005-2006開始聽，當時the lie lay land出左冇耐，引起巨大迴響。去到2007年發表嘅hurtbreak wonderland，我等到佢正式發行左一兩個月時間，先敢去左當時最好行嘅cd鋪搵(因為香港總係慢人幾拍)，Harbour City嘅Hong Kong records(當年文青最愛嘅Zoo Records，嚴格上黎講係行唔到，因為入面細到只可以原地自轉)，好多比女朋友更名不經傳嘅band仔都有。我搵左兩三轉都搵唔到佢，卒之走去問staff。個哥仔一臉黑人問號叫我寫低個名俾佢研究下
過左一排再去，女朋友已經係Hong Kong Records擁有一席位，仲有個牌仔寫住staff recommendation+有少少文字吹奏下。所以，我起碼係將女朋友引入香港連鎖唱片鋪嘅人

後來女朋友自立門戶，創立左廠牌Virgin Babylon Records，淨係俾人上網買佢嘅CD，直接從日本寄黎。廠牌出嘅第一隻係Seven Idoits，我收到果下，滿心幻想係由女朋友本人寄出，慢動作咁拆開。仲記得係個全黑嘅大大信封裝住。附送果張細細poster係床頭貼左好多年

我有幾百隻CD，得好少部分可以見到就記得買佢當日嘅心情，Seven Idiots係其中之一。新碟Resistance & the blessing嘅in the name of love有d似seven idiots嘅Les Enfants du Paradis，頭一次係spotify聽到果陣，我係街差d忍唔住跟住跳舞

如果同人講話聽女朋友令人體驗到世界變幻，相信至少，聽開classical嘅朋友會笑9我。但事實就係，女朋友係哲學嘅高度真係俾到我一d野，盡量寫出黎就係：就算係最頂級嘅甜美，或者話幸福？，都總有引起飽滯感嘅一日。之後你就會，用一種，中年男人見到初戀女朋友嘅心態，去睇佢。必須要好似女朋友咁，將甜美、鏽跡斑斑、見到野獸嘅絕望、崩壞，必須要所有元素都齊集，越係接近現實，先有可能經久不衰。必須要經歷隨波逐流、向上爬、享受、墮落、自我毁滅，樣樣做齊，先會有可能得到最頂級嘅滿足

2024年1月，差唔多廿年之後嘅今日，收到第一隻有女朋友簽名嘅CD。終於。開心到寫左上面呢堆文字