呢兩年香港周圍都好多gallery，有時會去睇下。以前好習慣睇文字、睇故事去理解一d本身唔明嘅野。我發現有時d artworks都有呢個功能，唔一定同作者嘅意圖有關。想講一個例子
首先我個心入面有好大好大嘅疑問。係一個都幾熟嘅媽媽朋友，有兩個小朋友。佢本身人工高過佢老公，因為返工壓力太大，要辭左職先成功陀到bb。佢地目標好明確，諗住女方做全職媽媽，生兩個小朋友，等佢地大d媽媽再去返工。計劃好成功，個媽媽諗住等細果個小朋友都返埋學就去返工。問題係個老公本身都懶，錢問題唔講，佢冇乜幫手湊細路，仲要每個月淨係俾一兩千蚊家用，老婆捱得好辛苦好殘；第二個小朋友出世之後仲出軌。老婆知道左，當然好唔開心，但係佢扮唔知，一有機會就係social media曬佢老公有幫手湊小朋友係個好老公。老公唔在場就對住我地喊，老公在場就笑笑口扮恩愛。我係理解唔到
後尾我唔覺意見到一件artwork，係由黑線繞成(thread art)嘅玫瑰，由香港藝術家Alfred Cheng創作，係佢嘅”Silent Love” collection入面。我竟然唔知點解明左上面個媽媽個case
我見到嘅係咩？
如果話大家對理想嘅家庭，有一個想像———兩個真心相愛嘅人結婚生仔，兩個人共同努力維持生計、照顧同教育小朋友，仍然擁有正常社交，仍然係兩個獨立有魅力嘅人，面對誘惑(誘惑係一定要有，否則代表果個人冇魅力)斷然拒絕，互相扶持到老———以上形象係一朵玫瑰，你發現對於其他只係有少少相似嘅形狀，你都會見到玫瑰個樣。呢個係其一
而現實入面當然唔存在同玫瑰一樣嘅家庭。而且你同人講自己理解嘅玫瑰係咩樣，會發現最尾大家只係講緊一堆冇意義嘅字眼(上面果堆字就係我嘅版本)。對理想嘅家庭係咩樣都冇辦法達成共識。即係每人都向緊唔同嘅方面前進。呢個係其二
今次講呢個artwork係由藝術家嘅手bring to reality。現實入面，我地用自己笨拙嘅手製作，心入面古靈精怪嘅玫瑰。其實俾人認到係玫瑰已經好了不起。呢個係其三
以上三點係件artwork幫我解開左嘅困惑。我唔覺得係作者嘅intention黎，佢有整好多其他嘅thread art，好靚但俾唔到咩想像我
之後就唔關artwork事啦
家庭嘅穩定形態可以好多元，可以俾周圍嘅人認同嘅得好少。係厭女大文化底下，好多時都唔係認同個家庭，而係個女主人做得點
成年人嘅世界殘酷在於，冇人會同你講你有咩唔好，冇人會同你講「你做左xxx所以我唔鍾意你」。只有行動，用行動話俾你知「我唔當你係frd啦」
我目睹左上面講嘅果個老婆，慢慢同我地呢班媽媽朋友疏離。我嘅情緒好理解到。理智話我知個問題係班媽媽朋友度。但雙方去唔到「啱同錯」出現反差嘅程度。但我覺得我可以扮冇事發生，係比選擇疏離嘅媽媽朋友更加好嘅做法
即係我都係想做個好人，覺得咁先可以未來過得更好