(本篇全篇係用本人嘅死八婆聲朗讀)
朋友生第二胎請工人，佢兩公婆都返工，本身搵長輩幫手接送、睇住大女。長輩係退休護士長，湊孫風格可想而知。朋友覺得1/長輩就算係護士長，一個人都湊唔掂兩個小朋友；2/長輩係佢地屋企停留嘅時間太長，佢地需要成年人嘅獨立生活空間。反正，到左一定要請工人嘅時刻啦
well，本篇嘅重點係請工人過程。不過請容我講左結果先
來自菲律賓嘅工人姐姐係我朋友生產之前入屋。我朋友放產假期間，咁啱佢老公轉工空檔期，留係屋企幫手湊小朋友。既然兩公婆都得閒係屋企，佢地暫時俾工人姐姐剩係負責清潔，諗住慢慢再教姐姐買餸同煮飯，最後先俾佢睇住小朋友。點知姐姐連清潔都做唔好
朋友講左個例子：朋友湊細仔湊到勁攰，有日唔覺意，見到大女個大型玩具(一個可以俾小朋友匿入去嘅城堡仔)上面封晒塵。朋友同姐姐講「咁污糟嘅，你冇清潔架咩？」姐姐答佢「我覺得唔污糟，我覺得唔需要每日都清潔」
朋友同我講返「佢剩係負責清潔咋喎？！玩具從來都唔抹，其他地方都唔係好乾淨，每日都唔知係度做乜」
後尾都係唯有請長輩過黎睇住。退休護士長長輩，draft左個list，同姐姐briefing，長輩會跟住個list check返佢做左未。姐姐好快就扭計，搵agent話要即刻劈炮。朋友產假都未放完，姐姐就走左
ok, 重點黎啦，個工人姐姐係點請返黎？
我見其他人第一次請工人都幾多野煩，又要interview。而當我問起朋友請工人progress，佢係笑笑口咁同我講
「我冇interview架，係聖堂朋友介紹嘅。佢話呢個工人好錫小朋友，錫d小朋友錫到連阿Sir都送禮物多謝佢，搞到Mum呷醋炒左佢」
我果時話「咦咁好好喎，最緊要錫小朋友」
後來我有問返朋友「咁佢係咪好錫小朋友呀？」
「錫鬼咩，都唔洗佢湊，佢乜都唔理剩係做清潔之嘛」
so，依家睇返最初聽到果段
「佢話呢個工人好錫小朋友，錫d小朋友錫到連阿Sir都送禮物多謝佢，搞到Mum呷醋炒左佢」
其中得兩個客觀事實：
1/ 阿Sir送禮物俾工人姐姐
2/ Mum炒左工人姐姐
以及一個間接呈現嘅事實：
3/ 放料出黎嘅唔係Mum
根據1-3，我地又可以重組下故事。嘻嘻。不過呢樣即使係八婆mode嘅我都覺得太無聊唔值得寫
而呢件事我俾佢嘅結論係「所有厭女角度出發嘅情報，只需要聽入面嘅客觀事實」
而延伸嘅討論係，
我問老公
「如果請工人可以揀男定女，你會唔會揀請男工人」
老公話
「唔好啦，好似以前d皇帝咁，唔想屋企多個男人係度」
我話
「咁我都會唔想多個女人係度，點解係你話事」
佢話
「男人會打飛機，你到時又嫌污糟」
然後我駁唔到