with瑪姬@福岡

辭職後, 聽瑪姬提起上年同fd約好去福岡, 點知個fd甩底, 我話我陪你去吧, 「好呀!」我極速買左機票。

瑪姬係以前一個Coworker。佢係上天對男性版嘅我嘅best offer。話說我受 「一生只為尋找肯陪我捱m記的女人」潮文啟發, 認真思考過(if me=male)會想要點嘅女仔。答案係一個Uniqlo返工, 青春開朗, 汪阿姐忠實fans, 默默等待一個接受汪阿姐fans做佢女朋友嘅善良男仔出現。瑪姬當然唔鍾意汪阿姐。但, 佢中學時會慳埋lunch飯錢, 獨自買飛去睇尹光演唱會… … 上天嘅offer超乎想象。

我地冇點plan行程, 只book左酒店&溫泉旅館。第一夜嘅晚餐去左”屋台”, 亦即日本嘅車仔大排檔。氣氛相當local但食物只是一般。瑪姬不停讚日式大排檔好有風味, 味道係「哈哈」。雖食物無助興緻, 瑪姬和我卻如像是隊了草, 在semi-outdoor凍冰冰的屋台飲凍冰冰的生啤, hyper到不得了大膽偷望對面枱日本妹, 細細聲大大聲研究隔離個日本男仔幾歲,。

Day 2一早起身坐左2個鐘巴士黎到由布院。呢個小鎮好清秀, 有d造型特別嘅觀光巴士, 瑪姬追住巴士影相, 同時向我坦白「其實我係巴膠」, 係best offer。坐低飲甜甜的燒酒, 日本豆腐一如既往咁香豆味, 想像藤原拓海嘅豆腐唔知係咩味。瑪姬忙個不停影相俾各路朋友, 臨尾為左追上我食野速度, 半杯燒酒一飲而盡。

瑪姬同我都係愛情長跑跑手, 我會講自己咁耐仲鍾意呢個人。講出口尤其斬釘截鐵。瑪姬話「我最鍾意佢果陣佢對我不瞅不睬, 到我冇咁鍾意佢又追我, 好自自然然一齊左」, 唉聲歎氣後又end topic。我想俾瑪姬知道不停講出口提醒自己好重要, 又唔能夠咁講。瑪姬遇過唔少有趣男性, 佢好厲害每次對其他男性動物嘅好奇唔超過2個月, 拒絕所有單獨見面邀請。 一切非常完美, 最多有時需要搵人告解。

後來行完熱鬧非凡溫泉區商業街, 最終到左夢眛以求嘅溫泉旅館。我地開心到狗仔咁, 好靚呀好靚呀, 唔止影相要拍埋片, 我hold機瑪姬聲音導航。一齊沖涼浸完溫泉, 大字型攤係tatami, 到左晚餐時間先戀戀不捨起身。

食過旅館美侖美奐晚餐(進食同影相所花時間相若), 我地hea左一陣又浸溫泉, 一齊fu mask, 互相擦背。日夜溫差好大, 從室內去露天溫泉總忍不住9叫, 凍到我地好認真咁制訂禦寒策略。除左溫泉時間, 瑪姬都係不停禁電話, 而我係發呆亂諗野, 成日俾佢鬧我執野慢, 我又鬧返佢唔訓覺嘈住晒。

離開由布院時我地買到名物B-speak roll cake, 傳聞佢「好食到流淚」。不是講笑的, 拎住個蛋糕一路行一路有人指住尖叫。我拎一陣瑪姬拎一陣, 要用貴婦拎手袋姿勢, 對途人尖叫必須扮聽唔到。我地從未有一刻咁接近一個合資格港女, 依家諗起都心跳加速。

之後行程係blank。瑪姬話「你係有意見果個, 我就乜都冇咩所謂嘅, 你話事啦」佢望住我對眼講, 我又望住佢, 睇落唔似發緊悔氣, 冇問題, 繼續前行, 去大分吧。瑪姬原來係鐵膠, too。係JR站台大叫「燕子號呀! 」追住架車瘋狂影相。我地係日本嘈嘈閉, 唔知會唔會俾人影上網公審呢。JR車長滿頭白髮斯斯文文好charming, 車廂內外都好靚, 我都差d變鐡膠了。

瑪姬買左好多零食做手信, 我不停笑佢「你去阿信屋旅行」, 佢話「呢隻我男友好鍾意食架」。 佢仲諗住買波鞋俾男友, 我提醒佢隻gip琴晚已經full左「hand carry上機都唔少野」, 佢話男友會黎接佢機, should be ok。又問我有冇人黎接機。我試過出夜街要求男友接被拒絕, 小心翼翼msg男友問, 佢覆「你當我咩人? 我梗係會黎」

我地嘅旅程, 係不停追逐JR及scan附近有冇靚仔靚女中宣告結束。我早一班機離開, 同瑪姬黎個擁抱道別, 佢突然好真誠咁講「唔好意思我冇好好咁照顧你」可能係指佢夜咳整到我訓唔著。我話「做乜咁講, 我都冇照顧到你」。出發前我男友非常唔睇好, 佢清楚我有幾難頂, 不停講「你地嘅友誼今次玩完啦~」, 我都有d驚, ended up友誼仲好地地係度。瑪姬好好。我男友黎接機, flight delay&luggage pickup加埋令佢係機場等左2個鐘, 佢仍然神清氣爽。男友好好。夜晚瑪姬msg話我知佢男友「兩手空空咁黎, 聖誕老人咁走」好可愛。有如白馬王子一直係幕後等待出場。呢一刻我地係童話故事主角。