後殖民食物與愛情
by 也斯
係小說，說是短篇集也可，長篇亦得，得左。
開篇一班老朋友於熟人酒吧雞手鴨腳亂中有序為久違嘅聚餐落手落腳，文句間滄桑似是末日前最後一次。之後每篇各登場一個客人做主角，故事有笑有淚，見證香港最光輝後殖民時代。
也斯寫後殖民嘅食物係name dropping，一心面向同享「集體味蕾記憶」嘅香港人，捨棄食家般費心累贅嘅描寫。耐唔耐附送一兩句咀刁刁評語。唔做作，係當年嘅飲食文化。
寫後殖民嘅愛情，同香港一d歷史事件綁埋一齊，情緒相當輕手唔甜唔膩，快刀斬亂麻。係回歸，沙士，雷曼呢d歷史大事面前，感情事顯得咁細碎，不如當記錄歷史咁jot低離離合合round 1&round 2，同埋保留偶爾瑣碎嗌交紀錄，等大家judge。A嘅罪名係「唔識食」，B嘅罪名係「膚淺」，C嘅罪名係「永遠扮受害者」，冇得上訴，槍斃。Bang！
反正香港地出名生活節奏快，精彩嘅野如同美食一樣泛濫，每樣都值得試下。香港人嘅拍拖同結婚，知道最終結果係邊個啱邊個錯就ok。過程唔好咁煩，唔洗太上心，最緊要努力返工，努力食好野。「香港人係咁架啦」
也斯記錄嘅係上一代香港人。係我地成日笑「唔敢罷工奴性好重」果代人。「唔敢罷工奴性好重」背後原來都有d故事。同樣係香港，本土可以有另一種解法。深入了解下佢地，所有取捨都咁合情合理。d前輩唔可以睇小。
當米線鋪開到成行成市被歸咎去「新移民多左」，當睇愛情小說講出黎會俾人笑，當鍵盤戰士都怕炒車保持沉默。我發覺我地呢代人比起「奴性好重」果班前輩多左好多自卑。