呢本書係一個已婚巴打推薦俾我，天真相信當中暗藏已婚人士心境秘密… 諗多左。
故事開端：
男主角同佢老死，係Virtual Reality研究所工作，分別負責研究將視覺聽覺訊號，以及將人造記憶植入大腦。
男主角愛上左每日搭地鐵都見到嘅女仔，可惜終於錯失表白機會。佢地冇再相遇，直到男主角發現佢成為左老死嘅女朋友。
係「平行世界」，男主角同個女仔成為左情侶，同居中。
「邊個至係真實嘅世界？」
本書全由男主角第一人稱寫成，大量內心獨白，正正回應書名「愛情故事」特質。文字平鋪直述，冇乜睇頭。開端淡而無味，之後書中世界突然好似㩒左fast forward一樣高速運轉。有科幻有言情，仲提供足夠推理趣味：讀者需要從男主角視角見到嘅有限資訊，慢慢構築起事實全貌。解謎線索零亂散落係兩個「平行世界」入面。
首先出場嘅感情線係主線，男主角盡力掩藏心意同老死couple成為朋友，三人行，令佢掙扎不已。然後係VR研究衍生出嘅「商業陰謀」，老死失蹤，發現公司異狀，冇人可以相信，男主角獨自暗中調查，當中不無驚險。不論是否推理迷，大腦必定跟隨高速運轉，企圖比男主角早一步接近真相。
於我而言，推理除左搵出謎底，更大樂趣係過程中閃現出嘅無數個可能性。如同作者其他作品《解憂雜貨店》《容疑者X的獻身》，令人沮喪嘅惡意唔會出現。解謎途中係腦中反覆咀嚼，判斷係出自惡意嘅動機，終於開估係出自善意。係最高水平嘅治癒。
****** ****** ******
本書於1995年出版，連手提電話都冇，電腦資料儲存係CD/MD入面。年代久遠，當中嘅科幻橋段好難避免會「熟口熟面」。因此故事個大格局唔難估到。好在將當中細節串埋一齊都足夠有趣。我本身以為地鐵相望係假記憶，只為掩蓋真正愛上女主角嘅場景…. 我以為兩位男主角係互換左身份。
人物方面睇得出作者花左唔少心思。男主角單戀嘅內心戲非常精彩不在話下。因為心虛，本身聰慧敏感嘅老死，係佢眼中變得陰沉多疑。而老死佢到最後都冇發覺自己嘅才華同能力，足以令男主角及女主角妒忌，一直困左係殘障帶俾佢嘅自卑，決定佢最終只會係一個悲劇人物。女主角就只係一個被追逐嘅symbol，作者企圖令佢成為擁有自我並善良嘅女神，係我眼中佢只係企埋一邊堅持要做個好人，「有著自我犧牲的自戀」，將「事業」當做避風港。太過單薄以致兩位男主角對佢近乎瘋狂嘅迷戀顯得莫名其妙。反而作者突然著墨係上東京尋找男友嘅廣島妹妹，平靜之下流露出個性，略嫌突出，明明只係茄喱啡，比較之下有點突兀。
最後，我討厭個結局。應該話討厭結尾一幕。女主角非要等到一個明正言順理由，先至敢坦白自己心意，間接證實左佢一直同老死一齊只係源於「自我犧牲的自戀」。呢種道貌岸然或者話叫政治正確好冇趣。