我很抱歉 (人間失格)

書名: 人間失格
作者: 太宰治

(可能會有劇透，而且係記錯嘅劇透)

睇完書寫review嘅難處，在於好多時真係冇乜野想講，但又唔想放棄呢個寫review機會，因為知道自己好快會唔記得。而借題發揮就易好多。今次適合借題嘅書係太宰治《人間失格》。

記憶中仍然保有主角大庭葉藏嘅印象。佢天性敏感聰明；為人冷淡；一遇到困難就調頭走；一遇到唔鍾意嘅事就調頭走。佢總有人愛錫，總有辦法生活得好好。而主角嘅結局果然係自殺。書入面最出名嘅quote係「生而為人，我很抱歉」，好順理成章將佢解讀成「我太差，唔配做人，失去做人嘅資格」。我剛剛睇完都冇特別再諗。

近來面對嘅事，令我改觀，強烈到忍唔住要借大庭葉藏黎呻。首先照顧下冇睇過人間失格嘅朋友，劇透多dd。書嘅基調無錯係相當灰暗，但灰暗只係源於大庭葉藏優柔寡斷，由佢自述所有野都係唔如意，唔完美。事實上佢短短嘅人生過得相當順利：聰明到所有人係佢眼中都係白痴；年少時有父輩庇佑；成年後每次逃避或者失敗，總會遇到好人，對佢唔止伸出援手，直情奉獻埋自己。佢老婆更奉獻晒自己美好嘅一面，即使知道老公目睹自己被姦只係匿埋一邊，都冇埋怨，仲try to cheer up佢老公希望生活可以返去以前咁。大庭葉藏俾佢嘅feedback係繼續逃避，「我覺得我老婆唔再美好」，「原來世界咁殘酷」，「完美嘅愛情係邊?」

大庭葉藏鬱鬱寡歡嘅自述，高超到遮眼，唔講以為佢人生不得志過得好艱難。「生而為人，我很抱歉」從來唔應該解讀做「我太差，唔配做人」。每個人只要出生係人群當中，就背負住「愛護他人」，「勤勉」，「迎難而上」，「負責任」種種期望。「社會」限制所有人必須向指定嘅方向前進，同時從來唔guarantee任何reward，「遇到挫折係上天嘅試煉」。而總有班人，好似大庭葉藏咁，不斷出聲求救，不斷要求他人給予，佢地生活得好好。就算係香港咁利益至上嘅社會，仍然過得好好。「生而為人，我很抱歉」 – 「我咁軟弱，同你地嘅期望背道而馳，但我過得比你地好，我很抱歉」

但從來冇人comment大庭葉藏做錯任何事。即使傷害左其他人，每每遇到有人講起人間失格，只會話大庭葉藏「為人軟弱」，「都唔係男人黎」。係呀，啱同錯只會用黎評論追求「愛護他人」，「勤勉」，「迎難而上」，「負責任」嘅人。對大庭葉藏同佢d同類，「佢地為人軟弱，大家唔好怪佢地」。

借題完畢。