近排睇左呢幾出戲

 

The Beguiled (2017) wiki trailer

Sofia Coppola執導。原著小說《A Painted Devil》早係1971年都搬上過大銀幕。

講述美國內戰時期，一個受傷逃兵俾女學生救起，收留係區內唯一仍然運作嘅女子學校。學校只剩低校長, 1個老師, 5個學生。中間發生嘅事包括對戰爭嘅無奈，與世隔絕嘅不安，年輕女仔對男仔嘅好奇，對傷者嘅人道，努力維持嘅道德正義，怕死，怕一個人，想逃離現況，互相唔信任。

戲嘅譯名係中港台分別叫《牡丹花下》，《美麗有毒》，《魅惑》。無一例外都用男性角度去睇件事，中國果個仲要懶文雅但嚴重劇透，真係冇眼睇。我眼中戲中人只係各取所需。
(註：我係唔係簡介唔係trailer嘅人)

頭先去search更多資料，原來小說同1971年嘅電影版本係以男主角角度敍述，得Sofia版本係相反，情況有如2006年嘅瑪麗皇后。
提到點解咁想拍呢出戲，Sofia咁講：

“The women were raised to be these perfect feminine creatures there for men, and then all the men disappear.”

好點題！

*** *** ***

細雪 The Makioka Sisters (1983) wiki trailer

市川崑執導。本身我係想睇佢老婆寫嘅劇本(佢老婆只肯為老公寫劇本)，而呢出係谷崎潤一郎原著小說改編。

講述昭和時期大坂一個末落大家族，剩低四個女，靠兩個大女嘅入贅女婿打理家族資產。故事係關於兩個細女嘅婚姻。佢地一方面保有大家族嘅自尊，一方面時代嘅轉變同家族末落，四姊妹感情好好嘅同時又不時有沖突。背景係日本男人至上主義，佢地對自己名存實亡嘅名門身份各有唔同理解。大家姐最努力保持傳統，二家姐就好似兩個細細妹嘅媽媽，三妹拒絕外界接觸拒絕變化保持自我，四妹最追逐新時代對女性自主嘅鼓勵。兩個入贅女婿都有自己位置。所幸成長於大家族帶俾佢地嘅唔止無謂嘅自尊，仲有善良同勤勉。

我最欣賞呢出戲入面出現左好多不同嘅人，哪怕一個對劇情進展無關重要嘅媒人，可以睇到佢地因應各自嘅性情閱歴而做出唔同應對。佢地嘅存在令出戲出奇咁真實。

出戲嘅英文譯者講過，原標題《細雪》如果譯做”fine snow”/”snow flurries”佢覺得會失去左日文果種含蓄美感。所以一般見到嘅譯名沿用最為中性嘅《蒔岡家四姊妹》。又話原名係來自主角三女蒔岡雪子。但我覺得四姊妹都係主角，各有引人入勝之處。「細雪」所指應該係全家四姊妹一同係家族別府賞櫻，櫻花凋謝好似細雪散落咁嘅景色，同時寓意蒔岡家族嘅末落。

市川崑每出戲都好正⋯⋯ 有d相逢恨晚。

*** *** ***

American Animals (2018) wiki trailer

一開始係俾佢個poster吸引。係我特別鍾意嘅semi-documentary類。

講述四個大學生發現圖書館特別藏書區有少量國寶級藏書，而根本冇守衛看守，深信偷書賣俾收藏家可以大賺一筆，於是開始煞有其事計劃偷書。出戲啱啱開始已經有加插真正嘅當時人嘅訪問，所以一開始已經知佢地會失敗。但無損睇戲興致。果幾個大學生係計劃途中已經不斷有人想放棄，甚至真正行動果刻有人驚到走左佬，要進行第二次潛入。期間睇得好緊張，令我諗起睇屍殺片場，又係不停見住佢地出錯好肉緊。

真正嘅當時人講起往事當然大嗌後悔，但佢地過得比我想象中好，如果同樣嘅事發生係香港or任何一個華人地區，幾個涉事大學生絕對唔會有翻身機會。

(offtopic, 諗起曾經嘅香港都出過賣白粉出身而如今成為一方名人)

*** *** ***

The Bling Ring (2013) wiki trailer

又係Sofia Coppola執導！但呢出係佢最唔Sofia嘅戲。一定要將佢同American Animals一齊講，因為同樣都係真人真事改編，都係一班大學生偷野。但又好唔同，Bling Ring係講一班有錢嘅大學生，去荷里活明星屋企偷luxury goods。

同好多觀眾一樣，我首先俾荷里活班有錢人近乎零嘅保安意識嚇親 —- 用香港做例子就係，原來住山頂班人個個都唔鎖門唔鎖車，冇cctv，冇工人看門口，屋企值錢嘅野多到俾人偷左d都唔發現！仲要係真人真事。唔知依家仲係唔係咁。

果班大學生服完刑依家都過得好地地，有幾個仲係名人，擁有一大班fans添。

呢出戲我認為最精彩，係妙麗(Emma Watson)個角色，一個無內涵但好清楚自己做緊乜嘅𡃁模。佢嘅演技令個角色alive左，簡直想follow佢instagram。而飾演女主角(主謀)嘅Katie Chang都唔差，佢嘅asian face，配合唔多講野，令佢對男主角嘅無情多左d耐人尋味。仲有樣野幾得意，果班犯案大學生係東窗事發後竟然有一班fans支持。男主角接受訪問(劇本內)話佢覺得依家嘅美國人仍然崇拜Bonnie and Clyde。對於香港人黎講，呢件事好難理解。

但以Sofia嘅戲黎講，我覺得呢出唔睇都唔算走寶⋯⋯

*** *** ***

Avengers: Endgame (2019)

Marvel戲冇乜特別想講。係戲院嘅時間係enjoyable嘅，d特技好fancy，故事都完整。又全部靚仔靚女。
但，
其實都好唔連戲d角色一時好打得一時好渣。最正嘅角色都Endgame晒，下次仲有咩借口睇佢？

*** *** ***

G殺 G Affairs (2018) wiki trailer

李卓斌執導！我離開戲院前默念左個名好多次要自己記住(但都有google多次confirm)。話說開場前有個疑似導演嘅人黎inspect，一開場就走左。當日只有十幾個觀眾，但過半數到留到睇晒credits，戲院趕人走先離開，可見呢出戲幾咁吸引！

講述一場古怪嘅兇殺案，警方調查後發現所有關聯人物都同一間中學有關。由女主角視角講述，佢最鍾意嘅字母係G，故事分拆成一個個以G作為initial命名嘅片斷。當中包括學生間嘅欺凌，女主角喪母之痛，女主角阿爸(警司)亂七八糟又合情合理嘅生活，女主角嘅妓女後母，師生戀⋯⋯ 好散亂但充滿魅力。其中一個主角成日拉大提琴，大提琴聲作為background foreground music咁貫穿成出戲，令人彷彿身處異國。

我估本土身份認同都發揮左好大作用，角色所面對嘅問題，我會話係「如有雷同只因大家都係香港人」。另外女主角唔知點解令我回想起自己中學時代，又係小小事就好易開心/傷心，原來自己已經有咁大唔同。戲中社會嘅殘酷並唔係來自邪惡。呢個事實令人好無奈，只有無力感，又搵唔到野可以blame on。好現實。我有時忍唔住諗，成日將問題blame on大陸人係咪一種遷怒？

我會將G殺同岩井俊二嘅《All about Lily Chou-Chou》拉埋一齊講，因為兩出戲入面嘅後生仔係幾咁相似。佢地冇乜目的，唔似正常套路嘅戲有task俾佢地，完成左故事再前進。無。只係得到生命，想盡快用完佢。類似叫強姦犯快d完事。

Lily Chou-Chou嘅後生仔當中，咁啱有個特別膽識肯飾演惡霸，其他人可以好好搵到自己位置—或者被逼成為弱者，或者成為幫兇。G殺嘅後生仔係典型香港人—我地唔可以做惡霸，因為可能犯法，一旦定罪成世人就係咁先。我地都唔想做受害者⋯⋯唯有聯合埋一齊恰d獨行獨斷嘅人，又唔可以太嗜血，總之唔可以犯法。唔犯法就乜都得。剩低嘅人就只好傷害自己。Lily Chou-Chou嘅結局太正義，香港唔會發生呢種事。

-完-