Byebye 2019

決定pickup返每年年尾寫一篇日記作結嘅習慣。

今年最特別嘅係多左隻衰貓(landed on 30th Apr)。我細個同細妹好幸福，係有狗仔陪伴長大嘅。因為有阿爸阿媽頂住，原來我地只係感受到狗仔嘅好處，到依家自己住，體會到衰–貓–唔–易–養–
又，雖然貓係比人類更高等更乾淨更靚嘅生物，原來佢地訓訓下覺會崩壞左變到好樣衰。係養耐左、佢放低晒防備，先會有機會見到佢地樣衰嘅一面。搞到我依家見到佢都覺得佢有d樣衰。最近佢開始好似我細個隻狗仔咁，聽得明人講野。
2020年希望幫佢減到肥。

11月17日晏晝，到18日凌晨，好正經咁對自己許左個承諾，咁認真許願成世人肯定係第一次：link

向來唔想做gathering搞手、成日約到一半唔想去，2019年尾憑住「今次我打死都唔quit」心態成功爭取年尾聚到餐飯。雖然冇神秘生物撐場有d冷清，但，知道有幾個人世界末日都出黎其實幾開心。
以後我都要用「今次我打死都唔quit」法寶應對所有事！

2019年我不幸比香港早一步進入經濟寒冬。結左婚個個以為我唔洗做有錢洗(包括我細妹)，即使我每次都有大聲反駁仍然都冇人理。係呢個複雜嘅處境當中，為左唔俾自己亂洗錢，我買野之前會寫低理由，過一排再睇返都仲係想買先買。寫低左先明白自己之前幾咁大洗、買野嘅理由幾咁on9。
望住自己極度on9嘅購物理由，between -明知on9都好想買- vs -銀包唔想俾錢- 果種掙扎之間不斷徘徊，我覺得shopping嘅樂趣，最enjoyable就係買同唔買之間果段時間，一買左就覺得「其實買唔買都冇所謂」。有d似仆野。
我仲要忍住唔俾自己叫老公俾錢… 好掙扎，好想買大量B6 size notebooks黎做comparison，B6 size同我手掌差唔多大，好正… 仲要後好少廠會出呢個size，仲要間間廠嘅B6 size都有少少唔同。
點解我會咁on9俾個notebook size吊住條癮咁耐。

關於香港嘅2019，留返日後係集中營再講。集中營入面如果大家可以傾計，好可能會好似城市論壇咁變左老男人嘅天下。

我被逼好近距離咁觀看上一輩嘅愛情。需要自細灌輸父權社會嘅固定男女價值觀、非常空白嘅精神生活、放棄左人本身嘅思想自由，最終先可以得出TVB式恩愛老夫老妻。睇多d TVB係咪可以有更主流嘅頭腦接納呢種恩愛。究竟TVB係害人定救人？

最後應該講下個老公… 成日幻想有一日老爺奶奶係我面前鬧後生仔抵死點點點，然後我爆seed鬧佢地，然後個老公發嬲要同我離婚。咁dramatic嘅事應該冇機會出現係我人生當中。

無論過左幾多年、中間做左乜野、香港發生咩大事，我嘅人生都係維持住「唔係特別精彩，但又唔想死住」嘅狀態。

Byebye 2019.
Hello 2020