嚴重劇透，未睇慎入

///// YOU 安眠書店 /////

呢出電視劇我形容做愛情版嘅The Talented Mr. Ripply，男主角Joe，承繼左一間書店，為左得到心目中嘅愛情，將自己包裝成另一個人，以無比強大嘅行動力，令女主角Beck不知不覺愛上自己。同普通純愛劇場嘅分別，在於Joe置愛情高於社會契約，為左愛情，不惜殺人，從零開始學識毁屍滅跡。佢明白用Google search野嘅風險，特登去舊書店搵劏雞劏牛嘅書研究，係同類戲劇之中好少有咁平實又與時俱進。
劇情行進中，大部份時間會配以Joe嘅內心做旁白，其中有段係換左Beck，我一度以為後面會換視角繼續敍述； 後尾又有一段係啪左藥之後見到嘅迷幻影像；仲有其他得意野一時記唔起。我諗冇乜人會expect拍電視劇會拍得咁實驗性同用心。

劇中嘅配角仔都好有存在感。Beck畢業於紐約市名牌大學，雖本身家境普通，但識得嘅朋友全部非富則貴。例如Beck嘅前男友Benji，一個二世祖，靠屋企嘅資源設廠製做「碳酸飲品」，以Organic原料及新奇口味作Gimmick。Benji冇樣好，連佢自己都話，Beck係個Bitch，係俾佢嘅錢、佢嘅二世祖朋友、二世祖型Life style吸引，Joe呢種窮人做乜都奪取唔到Beck芳心。Benji自出生就Gluten Free，一食Gluten嘅食物就敏感。又如Beck嘅Best Friend Peach，當Beck係佢嘅私藏公仔，唔希望Beck擁有事業，唔希望Beck有真心鍾意佢嘅男朋友，有極多飲食禁忌，其中之一係只可以飲鹹性水，否則尿道會出問題，嚴重到要入急診。所以想扮病得到朋友關心，輕而易舉。Peach另一個好「二世祖」嘅習慣係會將所有野事無巨細咁記低係記事簿，要自己嘅生活all under control，或者可以視作一種文明嘅體現。仲有How dare you類型嘅Blythe，極度政治正確嘅離經叛道人士。

Joe身邊嘅朋友就另一個層次。佢嘅鄰居有處理唔完嘅問題。俾男友家暴(未結婚就「家」暴似乎邏輯上有d問題)，因為男友係懲教官、有黑白兩道人脈、相當了解法律，為左怕自己個仔Paco被男友送去孤兒院，死忍。Paco就有Joe細個嘅影子。Ethan，書店嘅staff，額頭寫住純真善良嘅老處男。

好似講太多。結局係，Joe最後無法信任Beck。如果信任係武器，Joe係呢一回合輸左。

去到Season2，Joe俾從前嘅過錯追殺，逃離紐約市，去到洛杉機。又重施故技，愛上左另一位女主角，Love。Love有一個孖生細佬Forty。佢地出世於一個經營跨國企業嘅家庭，但，佢全家都有d變態。比如迷戀各種「自我增進」方法，瑜加、素食、冥想，做乜都根據「人生導師」嘅指示 —– 「你要同你屋企人增進感情」「oh! 今晚約佢地食飯先」，「我人生導師叫我同你食飯，希望你合作，幫我完善我嘅人生」。比如drug abuse。比如，人格上都有d問題。

Love出人意料咁主動。

Joe一心改過自新，竟然開始救贖同保護身邊嘅人，仲結識到真正意義嘅朋友。其中一個俾佢軟禁，可能即將被殺，點知誤打誤撞咁，戒左多年黎嘅毒癮嘅人，佢對Joe講：

「你就係以前做太多衰野，知道自己係個壞人，先會逼自己做好人黎贖罪。一個好人反而會容許自己係壞人。」

今次Joe「欣賞」Love嘅途中，原來一直俾Love「反欣賞」返轉頭。

最終回嘅信任遊戲，Love大勝。
佢地兩個好似係印度神話入面嘅天神，談情說愛好地地，嗌交就引發一場洪水要人間死傷無數。死去嘅人，成為佢地兩個，為左得到愛情所殺嘅祭品。No mercy。

Beck同Love我都非常鍾意。其實睇落bitchy到極點嘅Peach，我都好鍾意。

///// 董啟章 《神》 /////

我睇YOU前三四日，係旺角等人中途，上樓上書店，見到人人都讚嘅董啟章，竟然用到「神」為名寫小說，打書釘睇左少少。

後來係銅鑼灣一間大型書局，諗住繼續打下書釘，點知無呢本！我即刻衝去旺角書店，簡直係撥開左書架前傾緊董嘅一對男女，終於買到。

睇完YOU就睇神，同樣用左3日，慢慢睇。

神創作年期係2016~2017

小說分左3部份。

1係由刑天倪視角，花名「形」，知名作者。近來探索「無意義嘅文學」，寫缺乏愛情嘅情慾小說。
同老婆分居、阿仔同居之後，平淡咁生活(可以稱為隱居)。後來同「神」有一個秘密遊戲。

2係形嘅徒弟「景生」，花名「影」，以寫俾形嘅書信形式，寫左某一晚佢兩個意外相遇。

3係形個仔嘅補習老師、中大數學系、想轉讀演藝學院嘅女仔「幸晨」，花名「神」。
以神嘅日記形式，寫左秘密遊戲嘅過程同前因後果。

神一開始係個facebook/instagram post selfie收兵，作者特別強調「冇乜胸」嘅靚靚女大學生(同Beck嘅出場一樣)。佢幫形嘅中學仔仔補習數學，後來唔知發生左咩事，仔仔避開佢，突然住入宿舍。冇人通知神，佢黎到形屋企先發覺已被炒魷，形於是提出，你黎幫我放下狗，我照俾錢你。

熟絡之後開始左佢地嘅遊戲「兩人裸體咁係屋企入面如常生活，唔可以觸摸對方」

影早年同形一齊創立「文學創作社」，形淡出之後苦苦經營。佢用文學為立足點，同時關心社會議題，關心弱勢群體。但近年政治嘅動盪去到失控程度，佢地嘅主張跟唔上，以致，俾新興起嘅社運浪潮label做「左膠」攻擊，令佢傷心。而影咁啱好係呢個時刻，成長左做一個有能力照顧人嘅男人，愛上左呈現弱勢、有過自殺傾向嘅社運少女 —– 咁啱係神嘅roommate，為左呢個楚楚可憐嘅少女，放棄左拍拖10幾年精明能幹、一齊創立文學社嘅女友。另外，影睇好多書，過得好清貧。

我唔太清楚呢個「影」係咪真有其人，但佢嘅分身係一日到黑係文學作品出現。呢種人受唔到楚楚可憐嘅女人誘惑，遇到更慘嘅人會衝去救佢。因為永遠唔會俾自己做壞人，總會有機會返兜，令所有前度覺得自己永遠同佢割唔斷。好似睇書見到熟人咁。

返返正題。神 —– 話成本小說係圍住佢轉都不為過，或者因為我鍾意睇女仔 —— 好似一朵花咁，慢慢展開佢嘅美麗。
最初只係一個「女神」，係社交媒體收下兵，累積人脈，為未來可能進軍演藝事業鋪路。到佢知道左形係大作家，搵左佢d書黎睇，閒談間開始顯露佢嘅廣闊嘅內心世界。又講到佢嘅家庭。講到佢嘅「真正嘅朋友」疏離支(一個有才華嘅學生)。最後終於講到佢唔同其他人講嘅往事。
佢係可以係女神光環下，依然同不修篇幅、滿身濕疹嘅疏離支係校園漫步(事實係，呢個情景去到邊都非常吸引視線)，可以走去無厘頭咁問代數教授有關等號嘅哲學問題，可以係聽過數曲古典樂章同談論哲學家嘅對話中，得出「W的確是個非常健談的人，上天下地無所不知，但是，都是傾向理科的東西。就算是藝術，都是跟數學比較接近的類型，比如結構嚴謹的對位法音樂。」(quote自原文)，可以係得知姐姐出軌搵佢呻嘅時候，保持沉默。神完全對得住「神」呢個名稱。

神同疏離支嘅友誼好得意。

書入面好自然咁提到2016魚蛋革命。只有一段「(神打開電視)有大群戴口罩的蒙面青年，跟警察衝突。青年們手執磚頭，擲向警察。有警察倒地，頭破血流。有人幫忙挖出行人路的地磚，當中有年輕少女。」(quote自原文)
好明顯神睇嘅係TVB。
老實講真係幾煞風景。不過都過左去，應該反省點解本土派冇人寫到《神》咁好睇嘅小說？

關於魚蛋革命，我當年冇出現係旺角，都估唔到會因為魚蛋爆發。事後，我最記得係一串長長嘅namelist，當年被捕及入獄嘅人。我覺得香港人係最唔講信仰道德嘅華人，我地講法律，將法律當左係信仰道德/social norm嘅guideline。所以，當法律變左赤裸嘅權力工具，我地會失去信仰道德，會生存唔到。

據說「形影神」係對陶淵明致敬作，書中當然引用大量陶嘅詩詞。我只有係中學時期讀過歸園田居，明顯唔太夠做。另外亦有提唔少莊子，簡直係上左一課中化補習。睇得幾開心。仲有其他哲學講座型對話。比如「自我意識破壞自然美」、「隱居係係制度外對制度嘅無聲安全抗爭」「意識邊界」太多太多，所以要慢慢睇。

但，書入面都有d部份我唔鍾意。

其一係個寧嬰。形可以受精神問題影響出現幻覺，又或者，佢好希望老友返黎，而寄情左係個骷髏頭模型上面。但同成本書嘅基調好唔夾，亦一d都唔討好。用比較年輕嘅講法黎講，「睇到好尷尬」

其二係神進入主線冇耐，形就極速失去光采，本身有血有肉嘅一個人，夾硬咁因為性慾減退變到冇晒存在感，變左神嘅問答機。我覺得好唔連戲。

其三係將神寫得太老氣… 佢連追逐理想都缺乏激情。相比起黎，Beck就生動得多。都可能係我對文學嘅要求比影視高一截。

///// 雜項 /////

最後係想講，但唔知擺係邊嘅野

1. 《神》入面d對談，非常長篇及深入，講文學講哲學，眼界大開。
係我睇過嘅小說中，有一部係呢方面非常突出，因為大多數篇章係故事入面一位醫生嘅論文。呢本書係《腦髓地獄》，其中一句，我年輕時耐唔耐就鍾意quote下，當然自己嘅blog都要有佢出現：

「地球係巨型嘅瘋子治療場」

2. 《神》雖然想當然已係書面語創作，但當中夾雜左少少廣東話對話，同埋英文，有個位甚至係全段英文quote。我發現董用廣東話用得好聰明，係對話入面，有d好難會用廣東話日常對話表現到嘅位，佢直接轉返書面語，令香港讀者個腦跟車太貼撞左上去。我未見過其他人咁做(調轉黎就好多)。

3. 有一類人，就算普通交談，會不停Quote其他人嘅語言，表達自己想講嘅野，佢地可以係文人，可以係學者。佢地發言嘅開頭係「哲學家xxx講過」，充滿文明氣息。Netflix另一套電視劇Mind Hunter入面有一段，女教授都係不停Quote句子嘅人，佢嘅新伴侶講左句好有啟發性嘅野，女教授問「呢句係邊個講？」伴侶話「我lor，唔認得我把聲？」女教授同佢分手，其中一個原因，係嫌佢好認真咁睇雜誌嘅低b心理測驗。呢個係一個tips，俾求偶期嘅單身朋友，除非你嘅對方，對呢類紋身一樣嘅文明氣息不屑一顧。

4. 忽滑谷呢個名改得好正，我腦中畫面係Super Mario唔小心跌左海嘅音樂。佢果種騎劫式書評好有趣。

5. 神特別提到女主角係天主教徒。又要BinC般引述下我前同事，不停講「我係天主教徒黎，我唔得暴力架」，不停loop抗爭者嘅暴力場面，一面鬧佢地。佢建議200萬和理非一齊絕食，請求政府聽我地嘅訴求。我懷疑佢眼中嘅香港係個好危險嘅地方。佢有外國護照但一定要留係香港。我真實遇到最年輕嘅藍屍。

6. 董係書入面提到佢唔願意寫死佢嘅角色。遠離死亡換句話講係遠離暴力。好似我上面講嘅咁，Joe同Love嘅愛情就死傷無數，而我唔覺得呢一個係特別新或者特別舊嘅審美觀。反而諗起痴漢Ku前幾日分享一則中老年抗爭者，用廣東話屌柒人遲到no show，明明內容係嬲到核爆，但打出黎嘅文字好似不舉咁，及充滿揶揄式嘅禮貎。C小子直接話佢飲左涼茶先冇晒火。係幾時開始，香港俾呢種陽萎型，好聽d叫斯文，嘅風氣dominate，而唔係我地曾經有過，充滿火氣但亂中有序、朝氣勃勃。

7. 《神》擴闊左我對左膠嘅想象。嘗試用其他字眼，而唔係label形式了解佢地。但仍然係太單薄嘅人格。但又未單純到有種赤子之心令人想接近。俾個例子，How dare you，從佢言論中重組一個立體嘅人格係做唔到。並唔係話魚蛋革命當年嘅關注弱勢社運人士做左咩令人反感所以俾人不齒。對佢地，只係單純嘅，對自恃一身聖光嘅freerider，果種反感。我幻想佢地心目中嘅左膠(Yes，我心目中嘅左膠嘅心目中嘅左膠)係果種只會捐錢俾非洲或者中國山區，specifically俾小朋友，嘅組織。而呢種人令左膠自問唔算左膠。無錯，做善事、關心他人係無任何理由要受到反感，但請了解一個事實，就係香港，搵一個完全唔捐錢俾任何組織反而係少數，而做善事嘅人，並唔需要因為人數眾多成為左主流，而擔心自己嘅善良被唾棄。做善事可以睇成一種社會參與，而唔係增加自信嘅途徑。而我估計，關注弱勢嘅社運人士，亦唔會特別去多謝捐血嘅人，因為佢地係另一個catagory。唔係聖光照耀到嘅catagory之列。講到尾，左膠你睇唔睇到其他人有自己嘅追求？其他人冇阻住你追求你想追求嘅野，能唔能夠請你都一樣唔好阻住其他人？尤其係，果班流住血追求理想國嘅人。而如果去到呢個程度，左膠依然要追打佢地，我都無辦法唔出聲屌柒左膠，the uneducated me，夾雜粗口冇晒邏輯，到時左膠又會覺得，唯有果班陽萎人士講野好斯文，肯定得佢地識欣賞自己，而調整自己嘅方向，用更加陽萎嘅方法帶住文明唔知去左邊度。ok，我地信任大家，唔阻止任何一方，咁肯定會係最好嘅安排。而陽萎人士，可以繼續玩沙龍，討論魚蛋革命對中國沿海城市發展嘅影響、反送中運動嘅最終名稱，etc，只要唔好無啦啦幫其他人代言，冇人會介意你地講乜。甚至，就算有人所謂食人血饅頭，只要可以增加士氣，唔需要阻止。

8. 我之前唔覺意睇左d反戰作品，用「過去」「未來」黎二分左「和平」同「戰爭」。「未來」充滿希望，有無限種可能；但因為人生嘅時間係向前推，一個人嘅所愛同所恨只可以存在係「過去」，即係代表和平嘅果邊。呢個意象簡直可以話困擾住我。以「過去派」嘅思維，選擇未來，放棄所愛，係個無情嘅選擇。我係未來派。我覺得我可以好自信咁講我唔會係個無情嘅人，我所作嘅選擇會因為我同其他好多同樣not無情嘅未來派一齊，成為not無情嘅選擇。呢個係我嘅答案。