世界末日Rehearsal之武漢肺炎

首先，我見好多人睇我d集運比較文，提提大家，
各間集運公司嘅集運倉已經overload，比平常要預多5日，仲有可能因大混亂失件。
要怪就怪中國共產黨隱瞞疫情，唔及早隔離，依家超級傳染者已經去晒世界各地。
(有種講法話隻病毒係針對亞洲人嘅飲食習慣，睇返確診統計好似係真嘅)
#集運比較

以下係記錄歷史。

武漢肺炎timeline：BBC中文

今次中國疫情由隱瞞到爆出黎到官方確認，只係3-4日時間，估唔到香港人反應咁快，咁短時間已經搶物資。btw截至今日(6 Feb)，我住果區係最多確診人數最多，成為首個疫區。

/// 搶口罩 ///

最早係搶口罩。我記得係1月中左右，全香港都知道有樣野叫武漢肺炎，用隔岸觀火心態觀望。由於中國一年到尾太多呢類天災人禍，本身都唔太放在心上。1月20日左右，藥房開始瘋狂上口罩。

當時我仲有2盒，唔算太緊急。因為藥房賣嘅口罩牌子唔穩定，又開始有炒賣，轉而上網買，順便睇清spec。點知遇上農曆新年假期物流放假，而真正嘅疫情訊息公開又撞正果段時間，我1月20日開始訂嘅口罩到依家只收到一少部份。

其他所有人都一樣。就算好早就買左幾盒嘅人，比如我阿媽，都估唔到口罩呢d咁common嘅物品會短缺，仲送左d俾人。

N95口罩嘅價錢，係1星期內，由$20/pc升到$45/pc(latest update 5 Feb)。仲要N95已經唔算係ideal嘅防疫口罩。

我同細妹鬧交因為唔知阿媽d口罩點解消失左，後尾發現原來係阿媽自己唔知俾左邊個，阿爸又話要俾盒當禮物送俾唔知邊個。我好認真咁educate左阿媽，口罩只會越來越短缺。好在阿媽嘅搜購口罩能力同一個後生仔差唔多(proud of her!)，目前佢仲多貨過我，我有預留俾佢不過未洗拎返去救急。

阿爸出入有戴口罩。佢好認真咁同我地講
「你知唔知沙士果陣，死左嘅人當中冇一個係食煙。食煙可以抗肺炎。」
當然俾全家屌柒佢。

我老公嘅兩老好似另一個世界嘅人。奶奶係醫院，醫院怕外來人帶菌唔俾親人探病。老爺懷疑連新聞都冇睇，老公日日打電話提佢戴口罩，點知俾我地發現佢冇帶。佢話戴左俾人恥笑。
依家應該日日有戴了。
老公家姐叫老公俾口罩老爺。佢地習慣當我老公係工人咁。所以我又要幫阿媽阿爸搵口罩，又要幫老爺搵。有多再俾細妹。

細妹同我聯合左一條口罩戰線，佢要幫佢男友一家搵埋，佢地人比較多，寵物都多，已經冇乜口罩，要輪流出門採購食物。但佢first priority都係俾我地阿媽，有共識。

朋友間最多嘅交流係互相share口罩消息。

我俾美國同台灣分別cut左1張口罩單，夾埋10盒。

網店只要一傳出消息有口罩發售，半個鐘之內肯定會死server；鋪頭如果傳出第二日有口罩賣，夜晚就會有人開始排隊，每次都幾千人排隊；阿叔排唔到口罩當街喊左。居日港人鬧港人去日本掃晒d口罩，令佢倍覺羞恥。

有段時間d人執垃圾桶嘅口罩拎去曬乾左repack再賣。俾海關拉。
之後市面上就冇見到人曬口罩，但依然好多來歷不明口罩…

識左十幾年嘅完全政治絕緣體朋友，主動搵我話佢訂嘅到左貨就分d俾我；
有朋友撲口罩俾年輕抗爭者，唔知點解冇分俾長者嘅考慮；
一個朋友送口罩俾其他圍內朋友，但冇我份，我同老公講，佢話
「你係嬸嬸黎，點會期望有人送口罩俾嬸嬸」，幾有道理。但我係會送俾嬸嬸果種人；
有黃店免費派口罩俾人；
有親中派人士大量咁捐口罩俾中國。

有人會好老土咁講「緊急關頭睇清人性blablabla」，
我覺得係「緊急關頭睇清人人在乎嘅野唔一樣」

/// 搶消毒物資 ///

我係breakout前$5買左支120ml火酒，當時係玩黎玩酒精爐…
依家發夢都諗起果日嫌重冇買支大嘅，1L都只不過係$2x。
目前火酒已經成為比口罩更珍貴嘅物資。因為酒精係禁運品，普通人想上網外國買返黎係做唔到。

漂白水已斷市。我過年果期咁啱買左支，唔洗搶。

另外用開果隻衣物消毒劑就黎見底，本來果支$62，買/搶到支新嘅$85。

洗手液都有人排長龍買。其實一支連補充裝可以用好耐下，我唔明班人係屋企真係冇，定純粹買黎囤積。

/// 搶食物 ///

超市嘅公仔麵同米，長期俾人掃晒。
小店仲有，原來大多數香港人係會習慣去超市搶物資。
菜檔老闆話中國入口嘅菜少左貴左，反而其他地方嘅菜冇加價，變相平左。
我話「咁咪好，中國果d冇咁靚」

但搶糧食方面比較唔實際，太多選擇，除左米，好難會買清某一款產品(我冇搶米，煮中餐好麻煩，囤麵同意粉算)

有連登仔話清左半間房，擺滿午餐肉… 點解班人對午餐肉有種古怪信仰。
記唔記得中國仲有豬瘟豬肉。

有人話要囤食水…
如果真係停水停電停煤氣，做乜仲要匿係屋企。出街慶祝下世界末日呀。
禮賓府聚餐約定你。

/// 搶紙巾 ///

前晚有人傳消息出黎，話中國廠停工，紙巾(包括餐巾、廚房紙同廁紙)即將會缺貨。
於是好多中老年人湧去超市買紙，一買買好大量，甚至有人買大量m巾。

去人群咁密集嘅室內搶紙巾，就算戴齊口罩眼罩都好危險。

我又一次死好命，咁啱前幾日補左貨，應該夠用一個月以上。

好多人笑人搶紙巾…
呢班人真係小朋友黎，肯定係有阿爸阿媽工人幫佢買紙巾果d黎。
冇紙巾絕對大鑊過冇口罩。

附一張笑唔出嘅恥笑圖。

最重要嘅係，今次香港人，甚至全世界，都睇清左，樣樣生活必需品都Made in China，而China可以小小事就爆發全面停頓，將人生交托俾佢係幾咁反智。
慳左幾多只會嘔返突。

Say no to Made in China!

PS
Twitter有個say no to made in china challenge
tag #ABC_challenge

/// 醫護罷工 ///

疫情係武漢爆發。
武漢到香港只需搭3-4個鐘高鐵，所以好多人要求香港政府封關，停止放中國人入黎，保護香港人。
而香港政府，毫無懸念，係唔會封關嘅。

唯一企出黎要求談判嘅係一班香港嘅醫護。佢地罷工唔係要求改善待遇，係要求封關。
佢地做緊正確而艱難嘅事。

因為奶奶入院，我出入醫院嘅次數超過左大部份同齡人。
見到班醫護忙到仆街，飲飲下水俾病人家屬圍住問，對住病人依然氹細路咁氹佢地。
當然都有d醫生「比較有性格」(姑娘真實對白)，亦有d姑娘成日拮唔中血管整到病人痛多幾下。

我發覺好多病人家屬，就算真心明白香港醫護係長期工作量overload，仍然會忍唔住blame the victim，覺得自己親人醫唔好係醫護有問題。
可能我家教出左問題，從來冇咁抱怨過。
我會諗如果果個touchwood係自己阿媽我會唔會就blame the victim？
但我想象唔到自己會咁。

就算訓係病床果個係我，我都支持醫護罷工。

對於醫護罷工，坊間討論道德綁架、道德高地低地，呢d完全唔重要。
重要嘅係做正確嘅事。
唔好再俾港共政府spin啦。

6 Feb 2020