我返阿媽度食飯果陣，係書櫃見到細妹有本《貓手相》，教人睇貓嘅肉球可以知道隻貓咩性格。拎左返屋企對完自己隻貓，佢個肉球係屬於A3類型，係「懂人話的聰明貓」。
再揭下本書，有種肉球嘅貓被形容做最「有貓樣」。我覺得呢個講法好有趣。
今日同人吹水講起近排嘅BNO低門檻移民
有個準專業人士話，一收到消息，成個office d同事已經講緊要買定英國樓放租等升值、高回報投資，覺得佢地同蝗蟲冇分別。
我諗緊最「有香港人樣」嘅生物會係點？
「有香港人樣」，係好中性嘅描述，諗到兩個方面：
– 對錢銀、資產價值非常敏感
最搞笑嘅例子係，有日我一個人係茶餐廳食lunch，電視播緊爾冬陞套《忘不了》
故事入面張柏芝個小巴司機男朋友(古天樂)車禍死左，張柏芝收養左佢個仔，揸返同一條小巴線糊口，古天樂個小巴司機朋友劉青雲見佢好慘就幫下佢。係出好戲黎，我好鍾意張柏芝唔甘心俾人收陀地，走去黑社會巢穴同個長老理論果幕。搭枱果對中年couple，係睇到張柏芝俾人收陀地好慘果段，突然開始討論「依家拎個小巴牌要幾錢？」講講下仲傾埋的士牌幾錢… 我果下忍唔住即刻笑左，當然佢地冇理我。
– 唔容易相信任何野；但信左一個人就會信到底
話說我有左bb，千年一遇好好彩咁入左一個媽媽TG谷，入面個個都係正常人(真係唔易架)。呢班媽媽都好高質，我發現佢地大多有個特點，就係非常緊張多疑，而呢個唔係缺點黎，結果就係做事會好小心。比如，明明係私家醫生度抽左血驗，去到公立會特登唔俾份驗血report人，要抽多3-4支血驗多次，double confirm先肯相信自己冇問題(呢方面我就唔太香港人，俾左私家份report公立睇算)。
另外，相當重視私隱，但，當佢地相信一個人，可以乜都講，互send裸體相，係國安法、暴露左自己做暴徒嘅情況底下，仲同人講自己個名同地址！
可能因為咁，我覺得香港人好可愛。
/// /// ///
另外join左個假中立真藍屍嘅媽媽谷，佢地可以形容做有「藍屍樣」，同樣好中性咁描述，又諗兩個：
– 唔會放過任何曬命嘅機會，暴露私隱都在所不惜
只要有人講「有左bb，仲同另一半一日到黑仆野」，肯定一班人爭相鬥講鹹濕野，一個比一個勁；有人曬恩愛，會成班衝出黎曬，甚至post selfie(仲要唔遮樣!)；鬥大肚邊個身材keep得好就出一堆半裸照… 我覺得佢地都好可愛。
– 完美迴避政治話題！
連返工放工俾green objects放tear gas阻住架車，都只係客觀陳述！唔會有怨言！係條街到聞住輕微tear gas味，同時可以咩事都冇發生咁同人討論邊間BB鋪頭discount多d，令人有種佢地係bot嘅錯覺。好處係只需要關心自己生活，冇人repost黑警新聞、林奠個衰樣，唔會冇啦啦睇到人好嬲。
/// /// ///
最後我想講其實藍屍都係好人黎，一樣都會好關心其他媽媽。有部份係揸外國passport/回流，但大家好約定俗成share資料只會搵中文。
黃果邊高質好多，問乜都有人識(有唔同field嘅專業人士)，仲乜都講得好詳細。同埋普遍所有黃媽媽都識英文，大家直接post原文，睇youtuber都係外國人。大家可以講笑互寸。