有左bb之後，join左d準媽媽交流谷。其中一個同聲同氣嘅谷入面，所有媽媽都好好，有好多陀緊第二胎、第三胎甚至第四胎嘅媽媽，好願意分享自己經驗去幫其他人。
除左同生bb、湊bb有關嘅事，我意外咁得知左其他有趣嘅事。
/////////
1. 母乳餵哺
奶粉係一樣極度暴利嘅生意，外國進口嘅奶粉，黎到香港會貴左幾倍。我一路以為，係當年三聚氰胺事件(或者有人會講係大頭BB事件)，令中國人唔敢買中國製造嘅奶粉，轉而湧入香港買進口奶粉，先會有今日嘅炒價。
有位媽媽講左另一個事實出黎，佢係一個支持母乳餵哺組織嘅參與者。
據佢所知，本身香港仍然係一個相對傳統嘅社會，母乳餵哺係主流，好多家庭嘅女性係全職主婦。去到八、九十年代，香港經濟發展太快，需要更多更多勞動力，當時香港政府想d已婚女性出返黎返工，而外國d奶粉商亦睇準呢個市場，兩者一拍即合，一齊教育(或者話文宣?)香港人，令所有人相信奶粉比母乳更有營養。當時呢方面嘅研究好明顯係一個盲點黎，可以想像大部分「奶粉同母乳成份比較」嘅研究都係奶粉商贊助下完成，以致好多產科醫生淨係靠聽左d到院嘅講座，會將「奶粉營養更豐富」呢類觀點轉述俾準媽媽。結果就係，飲奶粉好快咁成為左主流。
但經過好多年之後，首先越來越多醫學研究指出母乳好過奶粉、母乳有奶粉不可取代嘅成分，which係今日已經成為大家共識；以及，據果位媽媽所講，飲奶粉大嘅呢一代人，各項健康指數都大不如前，大大增加左政府醫療負擔。所以呢幾年連政府都態度180度轉，鼓勵返母乳餵哺。
(題外，我認為醫療負擔增加，同人均壽命長左，仲有每日無篩選咁輸入150中國移民嘅關係應該更大。但唔排除政府暗啞底有數據睇到真係specific果班飲奶粉大嘅人健康問題多過其他群組。)
呢位媽媽話泛民d議員有幫左佢地好多，同埋將呢個議題帶左入立法會。所以依家會多左公眾地方(尤其商場)會有哺乳室。
現實係，雖然依然爭取緊更多母乳餵哺嘅支援，當年嘅決定已經改變左個文化，依家呢一代人，就算知道母乳好，唔代表佢地會支持其他人母乳餵哺。絕大部份人，尤其男人，非常唔習慣附近有媽媽母乳餵bb，比較好嘅會周身唔聚財，其餘會投以好奇目光，仆街嘅甚至會投訴。大多數僱主表現出絕對唔支持，公司唔會安排獨立一間房俾媽媽泵奶，即使係外資公司。
最後，我都唔知點comment好，果位媽媽講起以上一連串故事嘅時候，有其他媽媽咁樣回應：
a)佢睇唔起冇奶嘅媽媽；
b)佢咁講會俾好大壓力冇奶嘅媽媽；
c)佢知唔知冇奶嘅媽媽好慘架？；
d)佢係有老公養先會係咁講母乳餵哺嘅好處；
blablabla…
睇到我嘔血。
/////////
2. 24-week Baby
未陀BB之前冇乜concept，原來：
最後一次黎m果日計day0；
由day0計起，
8wk個bb已經有心跳，但仲未係人形，有條尾；
12wk個BB已經係一個迷你人仔，手腳一生成左就開始郁黎郁去，驗DNA可以驗到有冇遺傳病、係男定女；
20wk之前，一般個BB都大到郁果時足以令媽媽感受到，稱之為胎動，即係d人好興話「BB踢我」。其實好多時都唔似踢，似係游緊水，有時會feel到佢手腳係入面篤下篤下，你篤返佢係會有feedback。個肚太重戴托腹帶，綁太緊個BB個嬲左不停大力踢黎踢去；
但要到20~21wk照結構，先會發現物理上嘅缺陷，比如內臟有問題(eg少左某個器官、器官size太大太細)、外觀有缺陷(eg兔唇、手指腳趾唔齊)；
而24wk係法定嘅最大合法引產週數，即係話，如果想唔想個BB，要係24wk前引產；
28wk嘅BB器官已經發展成熟，出左世好大機會可以生存到，稱為早產；
37wk之後出世嘅BB，肌肉同脂肪都足夠保護佢嘅器官，先可以叫足月。
幾年前，香港法例入面要24wk後嘅BB先可以當係一個人。所以，如果24wk前個BB出世，公立醫院唔會救佢，私立更加唔肯收。而且，出左世嘅BB嘅body係「醫療廢物」，直接丟棄，準媽媽係唔可以拎返個body。
因為咁，一d意外流產、或者照完結構發現BB有缺陷，決定放棄嘅準媽媽，佢地連想要返個BB body好好安葬都唔可以。就算未出世，準媽媽對BB已經好有感情，可能係世界上唯一同個BB有過互動嘅人。承受完失去BB嘅傷心，同埋引產嘅痛苦，仲要自己BB嘅遺體俾人當垃圾丟走，估唔到香港嘅法律係咁無情。
幾年前香港法例先准許準爸爸媽媽拎返24wk前出世嘅BB嘅body。當時爭取呢個權利嘅立法會議員係譚文豪。
(香港媽媽之間流傳最早出世而且生存到嘅BB，係23wk就出左黎，有位名醫一直幫個媽媽保住佢，出世之前已經做好應變。個女仔7歲啦。如果唔係遇到位好醫生，佢幾年前會俾人當係一件醫療廢物。不敢想象！)
/////////
又話有本土投本土，
點知出黎最高票數果d全部又係泛民！！！！！
冇眼睇。
Be the first to reply