占星者說

呢幾年，屋企唯一3次壞電器都不約而同係水逆期間(1)發生，我忍唔住開始留意下西方占星

話留意其實只係得閒會開耳機聽下youtuber/podcast講，冇睇過書，連Astrology個Wiki page都冇認真睇過。so far我最鍾意一個希臘嘅占星師(2)youtuber，佢會講小至星座運程預測，大至星相點影響世界未來20年

上年佢其中有一集運程預測(3)，老實講預測嘅內容係冇乜用嘅，我係鍾意聽佢interpret事實同人心點樣互相影響。有個位我好深印象：

佢講到「解決問題=達至和諧」呢個概念。一班人有唔同嘅意見，最理想嘅模式係，經過深入嘅討論，每人作出唔同程度嘅妥協，得出一個「共識」，呢個共識就係答案。換言之，答案係「嘗試取得和諧」嘅結果

而「和諧」作為一個人生追求，係有佢嘅期限。去到某個階段，你會需要更大嘅野。佢就講到「相比起大家好和諧壓抑自己要求，不如嘈嘈鬧鬧但係每個人都一齊開心」，一種將「不和」睇成理所當然嘅處事模式

---

我諗起係我中小學年代非常之盛行嘅「世界大同」、「地球村」，主張打破地域同國家界限，所有人平等咁相處。果時嘅教科書同媒體都一日到黑係度講，d商業廣告都好鍾意用佢做概念

呢一刻嘅世界就好清楚全球化帶來嘅弊端，比如助長左極權國家嘅強制勞動(話說Uyghur有個字眼叫Hashar)(4)、傾銷低價商品去破壞發達國家嘅產業生態，比如點解我地會失去左農業同製造業(式微之後再出現就變左luxury product)。係好多年前，「世界大同」就宣告左過期

另一樣意識形態係係我中學時代，因為facebook嘅出現而達到癲峯嘅，旅行經濟。相比起購買商品，錢應該用黎購買(異國嘅)消費經驗。係全球性嘅over production/over consumption大環境下，旅行經濟refreshing到諗唔到可以點抗拒。要到左又係好多年後，俾太多中國人踐踏國土令班後生仔理解到「旅客太多係會影響到當地居民」，以及東亞人外遊exclusive嘅「旅行感受到俾人歧視，即使係社交平台曬完命都冇辦法抵消果種不快」，再加埋Covid嘅出現，先令旅行唔再獨霸消費經濟榜首

所以依家會見到(心理)年紀比較大嘅中產階層仲好熱衷去旅行，彷彿係佢地唯一嘅消遣；(心理)年紀比較細嘅就少d去旅行，會玩camping or outdoor yoga/water sport呢類玩意。「如果去旅行只不過係飲飲食食，不如留係屋企附近搵更加好玩嘅野」

---

上面嘅2個例子都係經濟活動推動嘅意識改變。我想像唔到由追求和諧演變成唔追求和諧嘅scenario會係點。「不和」可以擁有點樣嘅商業價值？我相信嘅一樣野係，雖然好多人話香港被國安同23條閹割、中產叻人移民走晒，預言香港未來會越來越了冇生氣，我反而覺得過去20年嘅香港先係悶到抽筋，聽本地音樂、睇港產片被認為係「冇文化」，藝術娛樂消遣外判俾歐美同日本。反而依家d後生，有班人好堅持咁要睇晒世界上最出名嘅西洋戲，有班會屌人唔聽本地音樂唔睇本地戲，有班得閒又撩下台灣人嗌交。唯一共通點係，佢地嘅討論唔係為左(亦唔會)得出一個共識。你講乜野表面上政治正確嘅野(eg m記食完野唔執枱嘅人係仆街)，持相反意見嘅人都可以好言之有物。至少，一如占星師話齋，已經冇人想要共識，大家enjoy嘅係屌黎屌去。下一個階段我希望大家唔好淨係係網上咁樣，面對面都要咁生猛

---

(1) 西洋占星學相信其他星球嘅重力同磁場會影響地球嘅一切。「水星逆行」，水星公轉得快過地球，有時係地球望過去佢會變左向後行。youtube有條片解釋得幾好 /Youtube link/

(2) Bracha Goldsmith /Youtube link/

(3) 唔記得邊一集。淨係記得係講天秤座(我老公)

(4) 「Hashar是被奴役，不给钱，任务完不成要罚钱。你不去就会被政府人员殴打和囚禁。」(Nov 2022) /Twitter link/