2024年年尾寫，本身諗住係2025嘅農曆新年post，寫完唔想再睇，一擺就擺左成個月，嘅年末總結：
1. Threads迷宮
大概係2024年嘅3月，開始出沒係Threads，呢個同instagram捆綁嘅social media，有古早forum味嘅陌生人吹水平台。可惜有字數限制，唔鍾意佢寫長少少(300幾字)就要break開係reply繼續。有好多篇我都因為字數限制，寫到好短，有d其實我好鍾意，可能會寫返篇長文擺呢度
呢一刻想提嘅係4月30日，見好多人講Netflix嘅《三體》，於是我打左篇漫畫review，用漫畫《百萬坪迷宮》入面提到嘅「外星人嘅星際交往生態」，對比《三體》入面嘅「陌生文化之間只有競爭」。冇乜人睇(得親愛嘅Ku㩒左like)。全文搬過黎先
30/4/2024
百万畳ラビリンス / 百萬坪迷宮 (2013) by たかみち
趁呢期Netflix上映三體，大家對科幻、外星人侵略地球，呢個話題仲有少少興趣，寫下呢本都幾怪異嘅短篇漫畫
開篇係兩位一齊打機嘅女主角，訓醒突然出現係一棟冇出口嘅建築物，彷似是寫實風格嘅密室逃離。故事展開，原來呢個空間，係外星人係地球秘密進行一項任務嘅buffer zone。外星人唔係簡單嘅「侵略地球」，地球本身嘅 1/資源、2/生命、3/habitat，佢地只想要其中一部分。呢班外星人又要遵守「宇宙公約」，that is文明程度較高(外星)嘅生命體，唔可以殺害文明程度較低(地球)嘅生命體，否則會有至高文明生命體派出嘅「宇宙警察」制裁佢地。因為規矩多多，人類竟然有反抗嘅機會
作者用「外星人入侵」呢個scenario，演繹將適應性當做絕對優勢嘅社會(日本)，人嘅行為模式太過單一，係一個弱點。呢個弱點如果有一日受到攻擊，會需要適應性低嘅人(eg邊緣人)去反抗。係一個「唔需要迎合主流」嘅討論
寫到呢度諗起神台級嘅Gantz。作者奧浩哉用左3D model協助作畫，人物同場景寫實到，去到後段人類俾外星人當成「可食用/觀賞用物種」，睇到我直情有PTSD。同《百萬坪迷宮》一致嘅係，有其他高等文明係抱持善意，嘗試對低等文明(地球)伸出援手
更多嘅Gantz劇透係不被允許。必須要一個人睇完冗長嘅、彷似冇意義嘅打打殺殺，先至可以進入一個瘋狂嘅虛構未來，見到至dark嘅情況，先至可以知道咩係最後嘅希望(the truth is大多數人係冇希望嘅)
好想知其他人睇Gantz會睇到d咩
打完上面篇文搵返d基本資料嘅時候，見到一篇台灣人寫嘅呢部漫畫嘅review(1)，其中有一段係咁：
「這類作品大部分都在探討的是現實與虛擬的界線，而且最終都能很理智的劃出現實與虛擬的界線；一級玩家不意外的，最終也還是回到這樣的”政治正確”，這當然不能說是缺點啦，但說真的，對我個人而言，還是覺得好像少了那麼一點點共鳴。
對我而言，真正喜歡遊戲的理由不只是遊戲的刺激或是挑戰通關帶來的成就感，深層來說，反倒是讓好奇心無限延伸的樂趣才是我著迷的原因，就像回到小時候，對周遭的小發現都充滿趣味，還記得我小學三年級父母第一次開放我自己可以騎腳踏車上下學時，一放學我就樂不思蜀，在城鎮裡到處亂逛根本不想回家，直到天黑被父母找到被拎回去。」
ACG黎講我淨係沉C(omic)；A(nime)輕輕會睇，理解到少少；G(ame)係一個理解以外嘅領域。見到有沉G嘅人睇到講Game文化嘅漫畫，同我理解嘅都幾唔同。本身以為呢部漫畫都頗有「平反」味，將gaming，一般人印象只係純粹嘅玩樂，講起一種正當嘅、有用嘅技能。但呢種平反都係多餘嘅，佢係「理解」同「唔理解」嘅人中間並冇成功搭到一條橋，甚至令大家有種互相理解嘅假像。人嘅諗法嘅光譜之上，「主流」比想像中狹窄，但係全體光譜係闊到，任何一個人冇可能理解得晒
之後我諗野耐唔耐會返返呢個「百萬坪迷宮」嘅位。保持一個同外界連接嘅9up狀態，有時就會有呢d大收穫
2. 6 men get sick 6 times
2025年1月15日，David Lynch逝世，朋友圈文青出文掉念。我淨係睇過象人，絕對算不上fans。諗起細個個blog名係來自佢嘅debut short film “6 men get sick 6 times”，我估佢貪6同sick近音。個blog最後一次update係2010年，算係日記，冇公開過。我已經有10年唔敢再睇。竟然因為David過世，重新睇返
要吹水嘅話其實都幾多野可以講。而最後我決定要講嘅，係我識得嘅一班女仔
細個對人比較好奇，去了解/八卦人嘅成本比較低嘅時候，識左好多精靈醒目嘅女仔(男都有，悶d)。唔知係咪因為我冇阿爸，定香港真係個broken family嘅rate咁高？識到嘅人入面唔少都係來自broken family，有兩個仲要真係好broken(可能某日會係報紙見到佢咁嘅level)。可能因為叻女，後來大家都過得唔差。雖然依家大多都冇聯絡
而最神奇嘅係，網上咪成日見女士post擇偶條件，以及男士瘋狂炮轟「女士提出左我達唔到嘅擇偶條件」。睇返我真實識得嘅叻&靚嘅女仔，得來自正常family(2)嘅女仔，會有坊間理解果種擇偶傾向，好一致咁揀左會俾男人鬧果種擇偶(同埋唔需要靚仔)。又係大家都過得唔差
做媽媽之後，識得唔叻嘅靚女過得好慘，同唔靚嘅叻女過得好好，好多人好多故事
結論係，擇偶條件係bullshit，女仔過得好唔好，單純係睇個人叻唔叻女
3. Airtag lost and found
前幾日粒Airtag唔見左，我用find my app搵，竟然係商場女廁個抹手紙垃圾桶。粒Airtag有刻左我仔個名「川」，唔捨得就咁放棄佢，我用紙巾包住自己隻手撩一撩d垃圾(得抹手紙)，聽到聲搵唔到。呢個時候見到廁所嘅清潔姐姐，係弱智人士，問佢佢話佢見係地下有粒唔知咩黎嘅野，執起掉左，我問佢可唔可以幫我執，我俾返錢你，來回溝通左幾次，佢叫我等等。佢戴手套用個污糟嘅鉗幫我搵返粒Airtag。姐姐問左我幾次「係咪好開心」
我洗乾淨粒Airtag，諗住俾錢個姐姐，原來冇帶現金係身，行左出廁所門口call老公，佢係商場同個仔玩緊車。等左3-4分鐘，見到老公問佢拎左張100蚊，入返去廁所搵姐姐俾佢
姐姐見到我呆左，好似食樹葉果隻樹熊咁樣，我話俾錢佢多謝佢幫我執返，佢話「哇好多錢」「我都唔識你做乜俾錢我」「多謝呀」「你好好人」「我都唔識你做乜俾錢我」
佢唔記得左我。我眼定定望住佢「唔記得左我」個樣，記住左幾日，呢一刻仲幾清晰。係我角度，佢算係冇工作能力，應該得到保護，困係一d地方俾專人照顧，嘅人。諗起2014年後巷隻貓芝麻，見到我地會要求抱抱，但係，係小學生放學時間見到嘅佢，同幾個小學生一齊玩，好似更開心。點都好，結局係，呢幾年黎我一直諗，如果我早d搬出去住，係佢俾狗咬死之前就抱左佢返屋企，肯定對佢黎講呢個係更加幸福嘅安排，我咁肯定，相信係因為我係呢個故事入面係一個英雄。我從一開始可能就係錯嘅。我要多謝呢個清潔姐姐，我諗左佢幾日
ref:
(1) https://forum.gamer.com.tw/Co.php?bsn=60037&sn=958007
(2) 正常family指：親生父母一齊同住成長＋過年過節唔洗同二奶/繼父食飯