電光火石之間，用左三四日時間摸索Wordpress嘅Ecommerce功能，係買左年幾嘅domain name個main page整左間網店。

午後士多 Afternoon Store

可能係失業太耐，得閒過龍，難得有機會玩下Excel/Photoshop，做得相當起勁。同時發現果d大牌子嘅網頁真係整得好有心機，連每粒icon仔都用自製嘅圖片。

點解會咁突然做呢樣野？話說前幾日發生左件事。

我老公有一個老人家同事，唔係老屎忽，係做野正常、唔卸膊、份人搞搞笑笑、就黎退休果種老同事。
佢夜晚9點幾急call老公：
老同事有個朋友仔，單身老人家，得隻老貓陪伴。朋友仔前排入左廠大修，將屋企鎖匙交左俾老同事，叫佢定時去喂貓同剷屎(每日俾$50酬勞)。隻老貓非常咀刁，只肯食某冷門牌子嘅貓糧，朋友仔以防萬一留埋貓糧嘅鋪頭地址俾老同事。
點知佢一入廠就住左幾個月。
前排間貓糧鋪聲稱因為反送中執埋笠。市面上居然冇一間大型寵物店有果隻貓糧。
隻老貓已經去到冇飯食狀態。
老同事求救，仲呻話原來養貓咁麻煩。又呻下個朋友仔唔知幾時先出得返黎。
老公上網搵到果隻貓糧，但冇門市只接受網購。老同事成世人未試過網購，教極都唔識。
最尾老公幫手買叫人送去老同事屋企。

話說十幾年前，我地受淘寶風潮學識上網格價同買野，只係因為慳錢 — 市面上一定可以買到同樣或者更高級嘅物品，仲要唔洗等送貨，網購嘅誘因只係因為平。
但依家個情況，完全唔同左。同一個牌子，黎到香港嘅門市只淨得最受歡迎嘅產品。冚家產個價錢仲要係全世界最貴嘅！(蕭生把聲)
唔係講笑，真係好on9，同一樣野係香港係賣得貴過倫敦、紐約同東京。仲要個產品Line唔齊全！

我發覺香港嘅租貴，竟然令一個普通人如果唔學識上網買野，就要佢
失去一部份選擇嘅權利，
仲要佢
接受懲罰 — 付出更多金錢。

本篇原意唔係要鬧政府，不過寫到呢度，忍唔住諗起香港政府連廣東省茂名市市政府都不如，忍唔住又要講聲粗口。ref.:
立場新聞報道：
//廣東茂名化州市有民眾連日抗議在當地興建火葬場，當局派出防暴警用催淚彈及水炮車鎮壓。有報導引述村民指，有老人和小學生被打到頭破血流，亦有防暴警員把人拖出屋外毆打。網上昨日（29 日）流傳一份化州市人民政府的公告，指項目存在不同意見，決定停止工程。//

最後，返返去「點解會想開網店」

我想整一間全部都係廣東話嘅網店。
冇生意都唔緊要。

完。